Pyntip u Dy. CM ba la shimkhia ka tnat PWD ban pynbha ïa ka surok Nartiang-Barato

Shillong, Nailar, 28: U Symbud Myntri Rangbah ka Jylla uba khmih ïa ka tnat PWD (Roads) Bah Prestone Tynsong ha ka sngi Balang u la ïathuh ba ka tnat PWD ka la shimkhia ïa ka jingtyrwa ban shna pynbha ïa ka surok Nartiang–Jonglwit–Barato, kaba la sniew bha haduh katta katta.
Haba jubab ïa ka Zero Hour Notice ba la wanrah da u MLA ka UDP na Mookaïaw u Bah Nujorki Sungoh, u Bah Tynsong u la ong, “nga kwah ban pyntip ïa u dkhot ba ka Sorkar kam shym la shong kli kti hynrei ka la shimkhia, ban wad ïa ki lad ki lynti ban weng ïa ki jingeh ba la mad da ki paidbah ka Mookaïaw khamtam ïa ka bynta jong ka surok Nartiang – Jonglwit – Barato kaba la sniew haduh katta katta.
“Ka tnat ka la shimkhia ïa ka jingtyrwa ban shna pynbha ïa ka shilynti jong ka surok ha ka financial year 2024-25,” u la ong.
U Bah Sungoh u la pynkynmaw ruh ïa ki jingeh ba la mad da ki paidbah nongshong shnong jong ka Mookaïaw Constituency na ka daw ka jingsniew shaba palat jong ka surok.
Ka surok Nartiang-Jonglwit-Barato (NJB), kaba jrong 35.40 kilomitar, ka long kum u thied snam ba kongsan kaba sam sha kiba bun tylli ki shnong.
Ka surok ka sdang na ka shnong Nartiang bad ka kut haduh ka shnong Barato. Baroh ki shnong kiba don ha kane ka thaiñ ki dei kiba ïasoh bad ka surok NJB la ka long lyngba ka surok ODR, surok shnong ne surok PMGSY.
U Bah Tynsong shuh shuh u la ong ba ka jinglong jingman jong ka surok NJB ka dang biang, lait na ka bynta kaba 7.00 kilomitar kaba la sniew, kata naduh ka bynta kaba 14.00 kilomitar haduh 21.00 kilomitar (kata, naduh ka shnong Takhniang sha Shilliang Myntang).
U la ïathuh ba ka surok naduh Madan Takhniang sha Thadbamon kaba jrong 3.00 kilomitar ka dei ka surok ïaid kali kaba la sniew. Hynrei ka tnat, kan sa shimkhia ban maramot ïa ka shilynti jong kane ka surok tang shu rang u slap.
Ka surok kaba jrong 9.20 kilomitar ka dei kaba ïasoh bad ki shnong Thadialong–Thadbamon–Musiaw–Latymphu ïa kaba la shna lyngba ka skhim PMGSY bad ïa kane ka surok la shna pyndep bad ka dang bha.
Lah ban kdew hangne, ba kiwei kiwei ki bynta jong ka surok ladep ban bishar bniah kum ka shilynter jong ka surok naduh Raliang sha Sahsniang kaba jrong 21.00 kilomitar lyngba ka PMGSY III-batch I bad ka jingtrei ka dang bteng haduh mynta.
Kumjuh ruh, ka surok na Laskeiñ sha Barato kaba jrong 16.20 kilomitar ladep pynrung hapoh ka PMGSY III-Batch I bad ka jingtrei ka la ïaid shakhmat.
Ka surok Pasyih-Garampani naduh 21.00 kilomitar haduh 48.00 kilomitar ka dei kaba dang bha, u la bynrap.
Ha kajuh ka por u Bah Tynsong u la pyntip ba ka jingshim jaka na ka bynta ka jingshna ïa ka surok 2-lane jong ka Shillong Western Bypass Road project ka la long 96.33% ha East Khasi Hills District bad 94.50% ha Ri Bhoi District.
La mang pisa T.5,92,03,07, 291 na ka bynta ban siew bailutksan ha kaba T. 479,46,09,470 la mang na ka bynta ka East Khasi Hills District bad T. 112,56,97,821 na ka bynta ka Ri Bhoi District, u la pyntip ha ka jubab ha Assembly.
U la pyntip ba la khmihlynti ban sdang trei noh ïa kane ka projek ha u bnai Nailur, 2024 tang shu rang u slap.
Ïa kane ka projek la khmihlynti ban pyndep hadien ar snem naduh ka sngi ba la aiti ïa ka kam.