Shillong, Naitung 28: Ka Sorkar Pdeng ka la thung ïa u Chandrashekhar H Vijayashankar kum u Lat ba thymmai ka Jylla Meghalaya hadien ka jingpynkynriah kam ïa ki Lat ki Jylla ba la pynbna paidbah ha ka janmied 27 tarik Naitung.
Katkum ka kyrwoh khubor la ong ba u Vijayashankar u dei u MLA barim ka Karnataka Legislative Assembly ha u snem 1994. Ha u 1998, ula shah jied kum u dkhot ka Lok Sabha na Mysore Lok Sabha Constituency. U la shah jied biang kum u MP ka Mysore ha u snem 2004.
Ka khubor ka ïathuh U Vijayashankar ula shakri kum u Myntri ha ka Sorkar Karnataka bad bat ïa ki Tnat kynthup ïa ka Tnad Forest bad Small Scale Industries. U la shah rem noh ha ka elekshon 2014 Lok Sabha na Hassan Constituency kum u kyrtong ka Bharatiya Janata Party.
Nalor kane, ula dei ruh u dkhot ka Karnataka Legislative Council naduh ka 15 tarik Jylliew 2010 tad haduh ba kut ka samoi treikam ha u Kyllalyngkot 2016.
U Vijayashankar ula iehnoh kam na ka BJP bad leit ïasoh sha ka Indian National Congress ha u Risaw 2017. Hynrei ha u 2019 ula leit ban pynïasoh biang ïalade sha ka BJP.
