Shillong, Naitung 28: Ka seng TMC kaba don ha liang pyrshah ka la dawa da ka jingtohkit kaba laitluid halor ka rai kaba la shim dangshen da ka Meghalaya Public Service Commission (MPSC) kaba la wanrah da ka thup ne ka additional list jong ki kyrtong kiba ïakhun ïa ka eksam MCS (Prelims).
Ha ka kyrwoh khubor, u nongïalam ka State Youth Wing ka TMC u Richard Marak u la ong, “Ngim lah ban ngeit ïa ka jubab jong ka MPSC, kaba ym shym la lah ban shim khia ïa kane ka jingshah kynnoh ba shah liang ha ka eksam. Da kaba kyntait ïa kine ki jingleh, ka MPSC ka la niad bad tap pynban hapoh ka carpet. Ka jingduna ha ka khuid ka suba hapoh ka OMR reassessment ka long kaba ym lah ban pdiang satia.”
“Ngi dawa da ka jingtohkit kaba laitluid kaba dei ban pynlong bad lehnoh mardor ha baroh ki kam kiba la paw, ba kynthup ïa ka jingbym biang ki kot jingkylli bad ki jingai marks, ka jingjied ïa ki kyrtong bad kiwei ki kam kiba ym shym la ïaid beit ïaid ryntih. Kine ki kam baroh ki paw ka jingduna kiba ym ju jia ha ki por kiba mynshwa,” u la ong.
U Marak u la ong shuh shuh ba ki la don ki jingsngewkhia haba ïadei bad ki kam leh shilliang bad ki jingshim kabu kiba ym dei satia ban jia na ka bynta ki riew shimet kiba don jingïadei bad ki heh ki haiñ.
“Shuh shuh ngi buh jingkylli halor ka jinglong aiñ jong ka additional list, naba ka paw ba la pynkheiñ ïa ka Advertisement paragraph 8(1), kaba la pynmih ka hukum ban khot sha ka Main Examination kaba ym dei ban palat ïa ka 15 sien ka jingpynbna ïa ki jaka kiba thylli. Lada ka additional list jong ki 62 ngut ki candidate ka palat ïa ka jingshah kaba 15:1 ratio, ka long kaba shai jong ka jingpynkheiñ ïa ki kyndon, kumta kane ka pynpaw ïa ka jingdonkam jong ka jingtohkit,” ula ong.
