U drok un kah-dum ïa ka lawei ki samla: Banteidor
Ka jingpynkup burom u MLA ka Mawkynrew ïa kiba dei hok ban ïoh
Shillong, Nailar 27 : U MLA ka Mawkynrew Constituency, u Bah Banteidor Lyngdoh u la pynpaw ka jingsngewkhia kaba jur namar ka jingïai kiew ka jingdih drok ki khun samla ha ka Jylla katba nang ïaid ki por ki sngi .
“U la pynjot ïa ka jingim ki samla bad khamtam ha nongbah Shillong bad kiba la ngat ki la shah teh mraw”, u la ong haba kren ha ka jingïalang pynkup burom ïa ki samla pule ka Mawkynrew Constituency kiba la wan sha khmat na ka eksam SSLC bad HSSLC mynta u snem ha ka 26 tarik u Nailar, 2023.
ïa kane ka jingïalang pynkup burom kaba la tip kum ka Mawkynrew Academic Excellence Award 2023 la pynlong ha Good Shepherd Higher Secondary School, Jongksha.
“U drok u dei uta u jingma uba lah ban wanrah ka jingsohsat bad ka jingdum ïa ka lawei ki samla bad un pynjot pynpra ïa ki longïing longsem bad ïa ka imlang sahlang”, u la ong
U la ong ba ki kmie ki kpa ki trei shitom bad ki shah jynjar ban ïohi ïa ki khun ba kin pule hynrei bun na ki khun samla ki pyrkhat ba ka lawei kam long kaba shai namar ka jingduna ki lad ïoh kam.
Da kaba ai mynsiem ïa ki samla pule ba kin ïaid sha khmat ha ki jingpule, u la ong, “Ka pule puthi kam dei eh tang ban ïoh kam ïoh jam hynrei kan saiñdur ïa uwei pa uwei ban lah ban ïakhun ïa kino kino ki jingeh”.
“Lada phi don ïa ka rai kaba skhem bunsien ki lad ki lynti ki plie ban poi sha ka jingangnud kiba phi thrang ban pynurlong ha ka jingim “, u la ong.
Ha kawei pat ka liang, u la ong ba ka jingjur ka jingpep skul shiteng por ki samla ka dei namar ka jingbym don ki skul pule hajan.
“Bun ki hap ïaleh ban beh sha Shillong bad na ka daw ka jingduna ka ïoh ka kot ha ki longïing bunsien ki samla ki hap ban ïehnoh shiteng por ïa ki jingpule”, u la ong.
“Ban weng ïa kane, kum u nongmihkhmat ka Constituency nga dang buddien ban pynurlong ïa ka College ha kane ka thaiñ na ka bynta ka jingmyntoi ki samla”, u la ong.
Ha kane ka prokram sam khusnam sha ki samla kiba la wan sha khmat na ka Secondary School Leaving Certificate and Higher Secondary School Leaving Certificate, u MLA u la pynkup burom ruh ïa lai ngut ki briew kiba la paw sha khmat ha ka imlang sahlang.
Kine ki kynthup ïa u nongïoh khusnam Padma Shree, u Bah Risingbor Kurkalang ha ka liang ka shna tiar tem bad rwai tynrai, ka Kong Sbunbha Kharumnuid kaba dei ka nongthoh poetry bad ka Dr Amanda A Pakynteiñ, kaba dei ka nonghikai skul step kaba la ïoh khusnam Best Woman Guru Award na ka 4th International Inspirational Women Awards (IIWA) mynta u snem.