Shillong, Nailar, 27: Kum shi bynta ban ïakhun ïa ka jingjaboh bad ban pynlong ïa ki shnong kiba khuid ba suba, ka Khasi Hills Autonomous District Council hapoh ka jingïalam jong u Bah Pynïaid Sing Syiem kum u CEM ha ka sngi Saitjaiñ ka la pyllait paidbah haduh 19 tylli ki trok kit ñiut ïa kiba ka la sam sha ki 19 tylli ki Dorbar Shnong kiba la jied na ki 19 tylli ki constituency.
Ïa kine ki trok la sam ha ka jingïalang kaba la pynlong ha madan Mawarling, Umpling ha ryngkat ka jingdonlang jong ki Executive Member, ka Joint Secretary jong ka tnad District Council Affairs, Kong A Nikhla, ki MDC bad ruh ki nongsynshar shnong na kylleng kylleng.
Na ka liang u CEM haba kren ha katei ka jingïalang u la ong ba katei kadei ka kylla kaba nyngkong jong ka Solid Waste Management Programme jong ka Council ban treikam ha u pud u sam jong ka Council.
Katba na ka liang u Executive Member ka tnad Development, Bah Carnes Sohshang pat u la pyntip ba ïa kitei ki kali la thied ha ka dor kaba kot sha ka 4.47 klur tyngka.
Katkum ka jingïathuh jong u, ïa ki 18 tylli ki trok kiba kham heh la thied ha ka dor 23.68 lak tyngka katba ïa kawei pat ka trok kaba kham rit na bynta ka Dorbar Shnong Lumshyiap la thied ha ka dor kaba 20.96 lak tyngka. Shuh shuh u ong ruh ba ki Dorbar Shnong ha shwa ba kin shimti ïa kitei ki trok ki hap ruh ban soi ïa ka soskular bad ka Council.
Shwa ban wai artad ka prokram hadien u CEM u la pyllait paidbah ïa kitei ki trok, ki MDC ki leit pat ban aiti ïa ki kali ha la ki jong ki jong ki constituency. La donlang ha kane ka sngi naduh u Deputy CEM, Bah PN Syiem uba pynïaid ïa ka jingïalang, Bah Lamphrang Blah Chairman ka Council kumjuh ki Executive Member bad ki MDC nalor ki Nongïalam Shnong.
Lah ban kdew hangne ba ka Council kala don da ka Khasi Hills Autonomous District Council (Solid Waste Management) Act, 2020 da ka thong ban trei ryngkat ryngkat bad ki shnong ki thaw ban wanrah ïa ka khuid ka suba.
