Shillong, Lber 18 : Ka sorkar jylla lyngba u Commissioner & Secretary ka tnat Pule Puthi mynta ka sngi ka la thung ïa u Secretary ka tnat Pule Puthi u bah R. Rapthap kum u Member Secretary jong ka State Education Commission (SEC).
Lah ban kdew ba ha ka 9 tarik Naiwieng 2022, ka kynhun myntri ka sorkar jylla ka la mynjur ban thaw ïa ka Meghalaya State Education Commission (MSEC) naka bynta ban wad ki lad lynti kumno ban kyntiew bad ban wanrah ka jingkylla ïa ka pule puthi hapoh ka jylla.
Ka rai jong ka kynhun myntri sorkar ka la mynjur ruh ba kin don haduh 4 ngut ki dkhot (Member) hapoh ka MSEC khamtam ban bishar haba ïadei bad ka jingdon bun tylli ki jait skul hapoh Meghalaya.
ïa kane MSEC yn khlieh da u/ka Chairperson, 2 ngut ki Advisers bad u member Secretary.
Haba ïadei bad kane u myntri rangbah ka jylla u Conrad K Sangma ula ong “ka long kaba donkam ban don noh ïa ka MSEC ne ka Commission naka bynta ban bishar ïa ka jinglong jingman ka pule puthi hapoh ka jylla naka bynta ban wanrah ka jingkylla”.
U Conrad ula ong ka thong bad ka kamram jong ka MSEC ka dei ban ai jingmut ïa ka sorkar haba ïa dei bad ki skul, ki college, ki jingtei ïa ki Building, ka rukom siew tulop, ka rukom treikam ki Management jong School bad College kiba don hapoh ka jylla Meghalaya.
Ula pynpaw ruh ba ka MSEC kan trei da ka jinglait luid naka bynta ban kyntiew ïa ka pule puthi hapoh ka jylla ha ryngkat bad ki kyndon jong ka NEP 2020 bad ka State Education Policy naka bynta ban wanrah ka jingkylla.
