Shillong, Lber 18 : U Nongialam ba la rangbah bha jong ka NPP bad MLA ka Resubelpara u Timothy D Shira, ula pynkhreh ban shimti biang ïa ka shuki Symbud Lamphang (Dy Speaker) ka ïingdorbar Thaw Aiñ ka Jylla namar ka jingbym don ki nong ïakhun pyrshah ha ka elekshon.
Kane ka la wan jia hadien ba ki lai tylli ki Party ba don ha Liang Pyrshah-ka Congress, ka All India Trinamool Congress (AITC) bad ka Voice of the People’s Party (VPP) ki la rai ban nym pynïeng kyrtong ha ka elekshon ka ban long ha ka sngi sdang jong ka Dorbar Mang Tyngka ha ka 20 tarik Lber.
U Commissioner & Secretary ka Assembly Bah Andrew Simon myn ha ka sngi thohdieng, ula pyntip ba u Timothy u dei u kyrtong ba marwei, uba la thep kyrteng ban ïakhun ïa ka elekshon Symbud Lamphang.
ïa ka kyrteng jong u la tyrwa da u Rakkam A Sangma bad u Marcuise N Marak jong ka NPP bad u ma Lahkmen Rymbui bad Mathew Kurbah jong ka UDP.
U Timothy ula bat ïa ka kam Symbud Lamphang jong ka samoi ba la leit ka ïingdorbar Thaw Aiñ.
