Kwah leit sum u Duhalia ka Bollywood ha Hot Spring bad leit jngoh ïa ka Dawki

Shillong, Lber, 18: U khlur ak phlim jong ka Bollywood u Sanjay Mishra uba long ruh uwei na ki duhalia ha kiba bun ki phlim ba la shna ha rithor u la pynpaw ïa ka jingangnud ban leit jngoh ïa ka shnong Dawki, kaba don markhap bad ka ri Bangladesh bad ban leit sum ha Umshit (Hot Spring) kaba don ha Jakrem, South West Khasi Hills District.
U Sanjay Mishra u la wan poi ha kane ka nongbah Shillong ban ïashim bynta ha ka Film Festival ba la pynlong da ka Meghalaya Film Makers Association (MeFilMA) ha u Soso Tham Auditorium naduh ka 14 tarik bad kaba la kut noh ha ka sngi Saitjaiñ.
Ha ka sngi ba la pynkut ïa kane ka tamasa pyni phlim, da ki phew ngut ki puron bad ki tyngshop jong ki phlim bapher bapher ba la pynmih ha kane ka jylla Meghalaya ryngkat lang bad ka Sonam Uangden ka puron na ka ri Bhutan bad ka puron na ri Vietnam ka Mai Thu Huyen ki la poi ban sakhi lang..
Ha kane janmiet, ka Myntri jong ka Sorkar Jylla ka Dr. Mazel Ampareen Lyngdoh ka la long kum ka Kongsan katba u duhalia ba la pawnam jong ka Bollywood u Sanjay Mishra u la long u kum u kongsan ba la shah khot kyrpang ryngkat ka jingsakhi lang jong ki nongïalam jong ka Meghalaya Film Makers Assocation (MeFilMA) ba kynthup ïa u Bah Commander Shangpliang, ki Director bad ki Producer jong ki phlim bapher bapher ba la pynmih ha kane ka jylla.
“U Sanjay Mishra u la pynpaw ba u angnud ban ïoh leit peit ïa ki jngohkai ha kane ka jylla jong ngi bad kawei na kita ka dei ka shnong Dawki bad nga la ïathuh khana ruh shaphang ka Hot Spring ha ka shnong Jakrem bad u la kwah ban leit noh marmar bad u ong ban leit beit sha Hotspring,” la ïathuh u President ka MeFilMA, u Bah Commander Shangpliang ha ka jingïakren bad ki lad pathai khubor ha ka sngi Saitjaiñ.
U la ïathuh ba ki don ruh ki nongshna phlim jong ka Bollywood kiba la angnud ban wan jngoh ïa ka jylla Meghalaya na ka bynta ban ringdur ïa ki phlim ba thymmai.
“Ka don kawei ka Production House kaba la thmu ban wan ringdur ïa ka phlim kaba thymmai ha kane ka jylla ban ïashim bynta da ka Vidya Balan. Ngi khmihlynti na kane ka tamasa pyni phlim khamtam hadien ba ngi dang shu dep pynlong ïa ka Curtain Raiser dang shen ha Mumbai ka la saphriang bha ka khana shaphang ka Meghalaya ba ka don ïa ki jaka kiba itynnat,” la ïathuh shuh u Bah Shangpliang.
Haba kylli, u la ïathuh ba na ka liang jong ki nongpynmih ïa ka phlim ban ak da ka Vidya Balan kim pat pynbna satia ïa ka kyrteng bad ong ruh ba ki nongpynmih ïa kane ka phlim ki la ïashim bynta lang ha ka Film Festival kaba la long ha nongbah Shillong.
“Ngi kyrmen ba ka Sorkar kan wanrah noh ïa ka polisi namarba ngi kwah ba kan don ka Single Window na ka bynta kane bad kumjuh ruh ka jingpan jingbit ba kan ym don jingwit haba ki (nongpynmih phlim ka Bollywood) ki wan sha kane ka jylla bad ba ka suk ka leit ka wan jong ki,” u la bynrap.
Shuh shuh u President ka MeFilMA u la ïathuh ba ha ka Film Festival ka ban sa long biang hadien habud yn sa wanrah da kiwei pat ki khlur ba pawnam jong ka Bollywood.