Shillong, Lber 18 : Ka sorkar pdeng ka la pyllait ïa ki skulbah ba don ha Meghalaya ban pynlong ïa ka Common University Entrance Test (CUET) na ka bynta ki samla pule kiba thmu ban bteng ïa ki jingpule kiba kham shajrong, halor ka nongrim ka jinglong jingman ka jaka.
Ïa kane ka rai, ka tnad Pule Puthi jong ka Sorkar Pdeng ka la thoh ruh sha ka University Grant Commission (UGC) ha ka 15tarik mynta u bnai ba ïa katei ka jingpyllait ban pynlong ïa ka CUET yn pynjlan sa shisnem kata jong u snem 2023-2024.
La pyntikna ruh ïa kane da u Myntri Rangbah ka Jylla, Conrad K Sangma lyngba ka jingthoh ha ka twitter. “Khublei shibun ïa u Myntri ka tnad Pule Puthi ka sorkar pdeng, uba la pynsngew ïa ka jingkyrpad jongngi ha kyrteng ki samla pule ban pyllait ïa ki college ha Meghalaya kiba pynïasoh sha ka skulbah NEHU ban hap ha ka CUET jong u snem 2023-2024, bad ban shah ïa ki ban bteng ïa ka jingrung klas kumba ju long.” u la ong ha ka twitter.
Shwa kane, na ka liang ka tnad Pule Puthi ha ka jingthoh sha ka UGC, ka la ong ruh ba da kaba peit ïa ka jingeh ban pynlong ïa katei ka eksam CUET, ka jinglong ka jaka, ka jingjnai, bad ruh ka jingjynjar ha ki kor ki bor bad kiwei kiwei, kumta ki la shim ïa ka rai ba ki skulbah ka sorkar pdeng ba don ha ka thaiñ shatei lamihngi ka ri kin ïoh ban bteng ïa ka jingrung klas khlem da donkam ban ïakhun ïa ka CUET.
Nalor ka Meghalaya, kiwei pat ki skulbah jong ka thain shatei lam-mihngi jong ka Ri kiba lait lang ki kynthup ïa ka Sikkim University, Rajiv Gandhi University, Manipur University, Assam University, Tezpur University, Nagaland University, Tripura University, bad ka Mizoram University.
