Shillong, Nailar 07: Ka kynhun ïalehkai phutbol ki thei ka jylla Meghalaya kiba mihkhmat sha ka lympung lehkai U-17 Girls’ Subroto Cup 2024 ki la ïai bteng ïa ka jingïaid lynti da kaba jop ar sien lynter hadien ba ka la jop biang da 1-0 kol ïa ka Maharashtra, ha ka jingïakhun napoh ka Pool D ha Gurgaon.
Ka shi kol na ka Susimery Lyngdoh Peinlang ka la biang pura ïa ka kynhun ban khur ïa ka jingjop ha kane ka jingïalehkai.
Kumban shu kdew, ïa ka Meghalaya la mihkhmat da ka skul Christian Higher Secondary School kaba na Ri-Bhoi Diustrict sha katei ka lympung hadien ba ka la rah ïa ka state-level Subroto Cup ha u bnai ba ladep.
Ha ka jingïakhun kaba nyngkong, ki thei ka Meghalaya ki la lah ban pynjemkhnap ïa ka Indian Public School Conference haduh 10-1 kol, ha ka Sngi Ba ar. La sakhi ruh ïa ar tylli ki hat trik na ka Pynibha Rangthaluh kaba la khyrwit marwei haduh 6 kol ha kane ka jingïalehkai, nangta ka Daïamon Makhroh kaba la thep saw kol.
Ka Meghalaya kan pynkhreh ïa ka jingïakhun sa mynta ka sngi pyrshah ïa ka Punjab ha ka por 3:30 baje ha kajuh ka madan.
