SHILLONG, Nailar 08: Ka Meghalaya Sate Kickboxing Association [MSKA] ha ka 6 tarik u Nailar, 2024 (Sngi Hat Majai) ka la ïoh ban pynkupburom ïa ki nongïalehkai kiba la khur 14 tylli ki takma na rynsan ïakhun kaba la tip da ka WAKO India National Kickboxing Championship 2024, kaba la long ha u bnai ba ladep.
Kumban shu kdew, kane ka lympung ka la sdang naduh ka 24 tarik haduh 28 tarik u Naitung, ha Goa, kaba long na bynta ki kyrdan senior bad master, baroh kynthei bad shynrang, ba la pynïaid da ka Amateur Sports Kickboxing Association.
Ha katei ka sngi la ïoh ban pynlong ïa ka jingai-khublei na bynta baroh ki nongjop kiba la wanrah takma ïa ka Meghalaya ha Hotel Assembly, Shillong. Ki coach jong ka kynhun ki long u Nathaniel P Kurkalang bad u Mordekai S Kharpuri, katba u Shaiborlang L Mawphlang u ba dei u referee, u la ïohruh ban pynïaid ïa ki jingïakhun ha kane ka lympung.
Kane ka lympung ka long ruh kaba kongsan na ka bynta ka kynhun kickboxing ka Meghalaya ba kin pynnneh ïa ka kyrdan jong ki khnang ba kin ïoh ban shah jied ban leit mihkhmat ïa ka ri India ha ka Senior World Championship, ka ban long ha Hungary, bad ruh ïa ka Asian Kickboxing Championship.
Kine ki nongïalehkai Kickboxing kiba la ïoh ban khur takma na ka WAKO Indian National Kickboxing Championship 2024 ki kynthup ïa 10 ngut ki Shynrang bad 4 ngut ki kynthei, kata lai tylli ki takma ksiar, san tylli rupa bad hynriew tylli ki rnong. Kiba jop takma ksiar ki long: u Babit Kharsahnoh (ha ka K1 ba -51kg), Juh Pa Juh Nongtdu (K1 ba -57kg), Fedrick Khongsit (Low Kick -54kg).
Nangta kiba jop takma rupa ki long: Ka Belldona Pakyntein (Low Kick-51kg), ka Daniella Mylliemngap (K1-56kg), u Ibansius Kshiar (K1-54kg), u Adialmarphi Nongdhar (Full Contact-51kg), bad khadduh u Wanlamkupar Thabah (K1-45kg).
Katba kiba la ïoh khur takma rnong: u Elbiston Kharkongor (Light Contact-45kg),u Rilangkupar Dkhar (Full Contact-91kg), u Benedict Khongsit (Full Contact-50kg), u Cornelius Maring(K1-48kg), ka Ibadahunshisha Rani (K1-48kg) bad ka Lanosha Marbaniang (Full Contact-70kg).
