SSA U-20 Fourth Division 2024: Rung semi final khadduh ka Madan S&CC

SHILLONG, Nailar 07: Ka jingïakhun Quarter Final kaba khadduh ha ka kyrdan U-20 Fourth Division 2024 jong ka Shillong Sports Association ka la jam sha kaba kut, bad ka kynhun kaba khadduh ban ïohrung sha ka semi final ka long ka Madan S&CC hadien ba jop ïa ka jingïalebhkai hynne ka Sngi ha SSA Ground, Polo.
Haba phai sha ka jingïakhun ka Madan S&CC ka la pynliem noh ïa ka Laitumkhrah SC da 2 – 3 kol. Dei ka Madan S&CC kaba la pynkhihjar nyngkong lyngba u Robindor Kyrsian tang hadien 4 minit ba la ïaid ka por hynrei la shah pynïakhaid noh ha u Sanki K Lynser (6 min) na bynta ka Laitumkhrah SC.
Ha ka 19 minit ka Laitumkhrah SC ka la ïoh ban lamkhmat kylla ïa ka jingïalehkai lyngba ka kol u Nangtei Kharbangar, hynrei shuwa ban jam sha ka kylla miet ka Madan S&CC ka la ïoh biang ban pynïakhaid lyngba u Iminstar Mawlong ha ka 37 minit.
Ka kol kaba la rai nongjop ïa ka Madan S&CC ka la urlong hadien ka jingbakla u Jeffery Kharbteng (Own goal) ban thep ïa ka kol sha kol lade ha ka 70 minit.
Haba phai dien, ka jingïakhun Quarter final ha ka Sngi Ba ar hapdeng ka Nongthymmai Raitnongkynrih SC pyrshah ïa ka Madanryting SC, ka la jam sha kaba kut ha kaba ka Madanryting ka la long ka kynhun ba khur ïa ka jingjop da 2-1 kol.
Na bynta ka Madanryting SC ki ar kol la thep da u Bankyrshan Ryndong (11min) nangta na u Sparlington Thongni (64min), katba ïa ka Nongthymmai Raitnongkynrih SC la thep da u Sengrak Jana ha ka 70+1min.
Kumba ka paw, ki kynhun ba la ïohrung sha ka semi final bad kiba la pynthikna ïalade ban ïakhun ha ka Third Division ha ka aïom ban wan ki kynthup ïa ka Umrynjah SC, Um ïew U Sam SC, Madanryting SC bad ka Madan S&CC.
Ka jingïakhun ïa ka semi final ba nyngkong kan long ha ka 12 tarik mynta u Nailar, ha kaba Umrynjah SC kan aireng pyrshah ïa ka Um ïew U Sam SC, nangta kaba ar ha ka 19 tarik ha kaba ka Madanryting SC bad ka Madan S&CC. Nangta ka jingïakhun final la pynbeit ha ka 24 tarik Nailar, 2024.