K a long kaba shisha ba ka jingpyndonkam ïa ki ïit ïong ha ki kali ka la kylla ne pynlong ïa ki kali ki jaka rieh jong kiba bun ki riew shim kabu naduh ki kam ïaluh samla lyngkar haduh ka jingïadih ïabam sngewbha kaba pathar, naduh ki jingïoh riehtngen jong ki riew pyntriem haduh ka jingshah shim kabu ki riew lui lui khmatam lei ki kynthei hynnah samla. Baroh ki sngew ba ka jingdon jong ki iit iong kiba ym don ba lah ban ïohi ka ai jingshngaiñ ïa kiba leit ba wan marwei bad ruh ka buh rieh ïa ki tiar ki tiar kiba ki kit ki rong, bad bunsien ngi klet ba kane ka juh ka iit iong ka buhrieh ruh ïa ki riew shim kabu bad ka ai jaka rieh ruh ïa ki riew pyntriem ha kitei ki kam kiba har rukom kaba niew hakhmat. Ym lah ban len ba ka jingpyndait iit iong ïa ki kali kam dei tang ba ka pynïoh ne pynduh jingmyntoi, hynrei ka kham pynitynnad shisha hi ruh ïa ki kali ba ju pyndonkam shimet.
Naduh ki bnai baladep la ïohi ïa ki Pulit ka jylla ba ki la sdang ban tar ïa ki kali tah iit iong, hynrei hato ka jingtar ka kut noh noh tang hapdeng ki riew paidbah, kumno shaphang ki heh sorkar pat? Ka aiñ kam dei ban long tang ïa ki paidbah, hynrei ka dei ban long beit 100% na ka bynta baroh.
U Superintendent of Police jong ka East Khasi Hills District u Bah S. Nongtnger ha ka sngi Balang u la pyntip ba ka tnat Pulit ka la ïoh bat haduh 408 tylli ki kali naduh ka 14 tarik, Naitung haduh ka 1 tarik Nailar, 2024 kiba tah da ki plastic rong ïong ha ki iit jong ki jingkhang kali bad ïa kine ki nongpynkheiñ aiñ la pynshitom katkum ki kyndon jong ka Motor Vehicle Act. U Superintendent of Police u la kyntu ruh ïa ki trai kali ba kim dei satia ban tah ïa ki platic rong ïong ïa ki iit jong ki jingkhang kali namarba ka pynkheiñ ïa ka hukum kaba la bthah da ka Iingbishar Supreme Court jong ka ri India.
Hynrei wat hapdeng kine ki jingmana bad ki jingpyrkhing, hynrei ki riewsaitlah kiba kham rben u saipan kim salia bad kim suidñiew satia ïa ka aiñ bad la i thik kumba ki kham long halor ma ki ban ïa ka aiñ bad ïa ka hukum jong ka Ingbishar Supreme Court jong ka ri.
Ka sorkar lyngba ka tnad pulit ka la pynih ïa ka hukum ban tar ïa ki iong naduh ki snem ba ladep, hynrei ka aiñ ka la trei kam suki bha. Bun hi ki sakhi ïa ka jingshisha ba wat ki kmie ki kpa kim tip shaei ki khun samla jong ki, ki leit namar mar la kiew ha ki kali iit iong ym tip shuh watla ki don tang ha surok ba phyllaw iing ruh. Ki bun bah ki jingjia ha kaba ki riew lyngkar ki ïaluh samla sahuh hapoh ki kali iit iong wat hapoh shnong poh thaw ruh tang ka kham kynjah briew kim salia shuh ïano ïano ruh. Ka jingïohlad ban don hapoh ka kali iit iong imat ïa ka long hi kumba tap hapoh ka nep.
La ju don ka jingjia ba ki riew shi kabu kim ju rung hi wat shapoh iing jong kita ba ki kam ba ki dei ki baieit jong ki, hynrei ki shu sangeh kali beit harud surok bad pynlong ka jingïakynduh bad jingleh sahuh beit tang hapoh kali. Katno ka long shisha kaba i jakhlia bad kane ka pynpyut shisha ïa ka imlang sahlang.
Da ka jingïohlad ban pyndonkam da ki kali tah iit iong, bunsien wat haba kit jubor ïano ïano ruh ki paidbah kim lah satia ban tip namar ba ym ïohi shapoh. Ki riew pyntriem ki ïoh shisha ban rieh tngen bad katno ki sngewshngaiñ ban leit ban wan bad pyndep ïa ki jingthmu jong ki. Khlem pep wat ki bor ka aiñ hi kin shem jingeh shibun eh wat ban buddien ïa ki riew sniew kiba leit ba wan namar ba kim lah ban ïohi ba mano ba don ha ki kali ba la tah iit iong. Khlem pep ruh ki kmie ki kpa kiba don ki khun samla ki ïakynduh jingeh shibun ban pynthikna ba ki khun jong ki, ki leit ki wan bad ki briew kiba kumno. Ka long kaba suk ïa ki riew shim kabu ban shet kylla ïano ïano bad ban leit da ka kynhun wat hadien ba la ïakut tang para marwei. Lada dei ba ym don ka jingkah ka iit iong da kaba suk lah ban ïohi mano ba don hapoh kali bad la lah ban sngewthuh lypa ban kiar ne ïada na ka jingjia ba sngewsih kaba lah ban jia.
Ka jinglah ban weng ïa ki iit iong wat la lehse kam long eh ka lad jingïada (solutions) ba 100% ban khanglad ïa ki kam sniew, hynrei khlem pep kan kham tehlakam bad wanrah ïa ka jingsngew shynraiñ pyrshah ïa ki kam sniew ba bun jait. Ki samla kiba dei khamtam ki khun ba riewspah kin sngew thait shibun eh namar ba kin duhlad ban lum paralok hapoh kali iit iong bad pynlong mobile sitting room (kamra shongkai ba ïaid), pynheh jingtem baroh shi lynter surok bad leh sahuh kum ka jingïadih beer, ïaluh samla lyngkar bad kumta ter ter. Ha ka juh ka por ki riew bymman kin ym lah ban ïaid laitlan namar ba wat lada ki shong hapoh kali ruh lah ban ïohi ïa ki da ki paidbah bad ruh da ki briew jong ka aiñ.
Kan long hi ka jingbishar hok ïa ki paidbah lada ka sorkar kan lah ban seng lut ïa baroh ki iit iong na ki kali. Don kiba ong ba ka long ka jingduh jingmyntoi lada weng noh ïa ki iit iong namar kito kiba niah kali marwei sha ki lynti ha kham jngai bad por mynmiet kin sngewshngaiñ namar ba ki riew shim kabu ki lah ban tip da kaba suk katno ngut ki don briew hapoh kali. Khamtam ki kynthei kin ym shngaiñ shuh ban niah kali por miet por iong ban pyndep ïa ki jingdonkam jongki.
Ha kajuh ka por kan pynsalia ruh ban ieh ïa ki kali ha ki jaka sangeh ne parking lot ryngkat bad ki tiar kiba shongdor kum ki Lab Top bad Mobile bad kiwei pat ki tiar ba ki leit siew leit pet namar ba ki nongtuh bad riew shim kabu kin lah da kaba suk ban ïohi don aiu hapoh kali. Hynrei ka jingkylli mynta ka long haduh katno ka aiñ ka treikam namar ba kane kam dei satia ka sien nyngkong ban pynmih hukum ban weng ïa ki iit iong, hynrei haduh mynshuwa ruh na ka por sha ka por ka la ju jia.
