Shillong, Ïaïong 02 : Ka Umphyrnai SC ka la ïoh ban khur jingjop kaba heh tam ha ka lympung ïalehkai phutbol ki heprit ka Under-10 Football League 2023 ba pynïaid da ka Shillong Sports Association (SSA). Ka Umphyrnai SC ha ka jingïalehkai kaba nyngkong ha ka sngi Saitjaiñ ka la pynbam haduh 25-0 kol ïa ka kynhun ïalehkai jong ka Rangdajied United FC ha ka jingïalehkai ha madan Polo.
Ha ka jingïalehkai kaba ar jong katei ka sngi, ka la long hapdeng ka Sohryngkham SC pyrshah ïa ka Mawlai SC ha kaba ka Sohryngkham SC ka la pynbam da 14-0 kol. Ka Mawreng SC ka la ïoh ban pynliem da 1-0 kol pyrshah ïa ka Kynton U-Mon ha ka jingïalehkai kaba lai.
Haba phai sha ka jingïalehkai kaba saw, ka Mawkriah West SC ka la shah rem da 0 – 6 kol ha ka Mawpat SC. Katba ha ka jingïalehkai kaba san bad kaba khatduh jong katei ka sngi, ka Them Rangshken A.C.C ka la pynliem da 13 – 0 kol pyrshah ïa ka Challenger FT Academy.
Na ka daw ka jingbym lait ka madan ïalehkai ha ki ar sngi kata ha ka 3 bad 4 tarik na liang ka SSA kaba dei ka nongpynïaid ïa katei ka lympung, ka la pynbna ba ïa ka kitei ki ar sngi ki jingïalehkai U-10 (Boys) Football League 2023 la pynpep noh shuwa.
Kumta ïa ki tarik ïalehkai na ka bynta kitei ki ar sngi ba la pynpep ka SSA kan sa pynbna pat hadien.
