La 50 snem khlem lah pynlong elekshon Municipal ha ka jylla ba jur palat ka jingpyrshah

Shillong, Ïaiong 01 : Ïa ka elekshon Municipal ym shym la lah ban pynlong ha kane ka jylla ha ki 50 snem ba la dep na ka daw ka jingpyrshah jur na baroh ki liang.
Kane ka long katkum ka Annual Technical Inspection Report (ATIR) on Urban Local Bodies kaba dei jong ka samoi treikam ba kut ha u Lber 31,2018.
“Ym shym la lah ban pynlong elekshon jong ka Municipal Board hadien ba ka Meghalaya ka la ïoh la ka jong ka jylla ha u 1972 na ka daw kiba bun ki daw kum ka jingpyrshah da ki nongshong shnong kiba hap ha ka Urban Area kum ha Williamnagar MB, ka jingpyrshah ba la rah da ki sengbhalang, ki samla pule bad ki union bapher bapher (Tura MB), High Court order halor katei ka jingjia kaba la ujor da ka Jowai Civil Awareness Committee ha u 2000 (Jowai MB) bad kiwei kiwei,” ong katei ka report.
Ki don baroh hynriew tylli ki municipal board (MB) ha ka jylla Meghalaya tad haduh ka 31tarik Lber, 2018 bad ki hap hapoh ka Meghalaya Municipal Act, 1973.
Katkum ka Meghalaay Municipal Act, 1973, u Chairman u dei u Executive head jong ka MB bad u dei bna shah jied ha ki ward commissioner kiba la dep shah jied.
Hynrei namar ka jingbym don ïa ka kynhun kaba la shah jied, ïa ka bor jong ka Board la aiti noh ha u Chief Executive Officer uba trei artad kum u Executive Head, la bynrap shuh shuh.
Ka 74th Constitutional Amendment ka plie lad ruhban ai bor ban pynïaid ïa ka pisa bad ka jingtreikam sha ki ULB da ka sorkar jylla haba ïadei bad ka jingpynkhreh ïa ki plan bad ki prokram pynroi bad imlang ahlang haba ïadei bad ki 18 tylli ki kam kiba la kdew ha ka Twelfth Schedule jong ka Riti Synshar ka Ri.
Ka Report ka ong ruh ba u Director Urban Affairs Department (kdew ha u Kyllalyngkot 2021) ka ong ba ka sorkar jylla ka la ai bor ïa ki 16 tylli ki kam jong ka ULB lait noh ïa ka kam pynlip ding, kam khlaw ha ki jaka sor, bad ka jingïada ïa ka mariang bad ruh ban pynneh pynsah ïa ka.
Ka jingbthah ban pynstet na ka bynta ban ai bor ïa baroh 18 tylli ki bor bad ki kam la dep ban kdew ruh da ka Audit hapoh ka ..ATIR na ka bynta ka snem ba kut ha u Lber 2014. Ka daw pat na ka bynta ba ym pat lah ban leh haduh mynta ym shym l akdew satia da u Director UAD, wat haba la dep ban pan ha u Nailur 2017.
Ka Audit ka lap ruh ba ym baroh 16 tylli ki jingtreikam ba la ai bor sha ka MB kiba la pyntreikam da ki hi. San tylli na ki kam la pyntrei beit da ki tnad jong ka sorkar kum ka Urban Affairs, PWD, PHE, Social Welfare bad kiwei kiwei.
Ka Reprot ka ong ruh ba lah ban ïohi ruh ba na ka jingkdew ba ar tylli ki kam, kata ka public health bad ka sanitation conservancy bad solid waste mangement ba ruh ka vital statistic kynthup ïa ka jinglum jingtip ïa ka kha ka ïap la pyntreikam da baroh hynriew tylli ki Municipal Board.
Ka Shillong naba kadei ka nongbah ka la kham treikam bha namar 10 tylli ki kam la pyntreikam pura lane katto katne. Ka sorkar jylla ruh haduh mynta kam pat mang pisa sha ki MB na ka bynta na ka bynta ban pyntreikam ïa baroh 16 tylli ki kam.
Ka report ka ai jingmut ruh ba dei ban ai pura ïa ka bor bad ki jingtreikam sha ki MB nalor ban ai ïa ka mang pisa kaba biang ryngkat ka jingpeitngor kaba janai khnang ba kin lah ban ai pura ïa ka jingtreikam kumba la bynshet ha ki.