Ki la kynnoh ba nga leh biej, mynta la paw shai ka jingdonkam ban pynbeit thymmai ïa ka Reservation Policy : Adelbert

Shillong, Ïaïong 01: U MLA ka North Shillong Constituency u Bah Adelbert Nongrum u la ong ba ka jingshah kynnoh ba u leh biej, kwah leh drama halor ka jingdawa ban pynbeit biang ïa ka Reservation Policy da ki kyrtong kiba ïakhun pyrshah ïa u bad ki party ba kynthoh ïa ka VPP ha kane ka elekshon ba dang shu dep hynrei mynta ka la paw shai kdar mynta ba kane ka policy ka donkam ban pynbeit biang namar ka dei ka jingdawa ka por.
U Bah Adelbert u la ong ba ka jingkhih win kaba la sdang ban sakhi ha ka jylla halor ka Reservation Policy hynrei ha ka por ba u la kren ïa kane ka mat ki MLA ba don ha ka liang synshar ha ka sorkar MDA bad ruh ki Myntri sorkar ki kynnoh beit ba nga leh da ka jingsngew ym da ka jingstad.
“Ki paidbah ki sakhi ba nga la rah ïa ka jingdonkam ban pynbeit biang noh ïa ka jingduna kaba don ha ka reservation Policy hynrei ym don ba sngap bad khyndiat ngut eh ruh kiba kyrshan hynrei mynta baroh u paidbah u sakhi la ka jingleh jong nga ka dei kaba leh da ka jingsngew ne da ka jingstad,” ong u Bah Adelbert.
Haba kylli halor ka jingpyntreikam ka sorkar ïa ka Roster u Bah Adelbert u ong, “Ka VPP kumba la kren da u nongïalam jong ka parrty ba dei ban pynsahngeh shuwa hynrei ban pynbeit shuwa ïa ka Reservation Policy bad kane hi ka dei ka nongrim jong ngi kum ka party.”
“Nga la pyrshang ruh ban rah ïa ka Adjournment Motion halor ka Roster System hynrei ka Ïing ka la kyntait, nga la rah ruh ïa ka Resolution halor ka Reservation Policy hynrei kam poi kumba nga thmu bad kiei kiba la paw na kine ki ar tylli kiba nga la kren ba ki donkam shisha ban peit biang,” u la ong.
“Ki kynnoh ba nga leh biej, ki kynnoh ba nga leh drama, ki kynnoh ba nga leh shongshit, hynrei mynta ka paw ba u Bah Adelbert u leh drama ne kita kiba kynnoh ïa nga ba nga leh drama ki dei ma ki pynban ba leh drama ïa ka lawei ki khun samla bad ka jylla lyngba ka Reservation Policy bad ka Roster System,” u la bynrap.
U la ong ba na ka liang jong u bad ka VPP kin ym shongthait noh na kane ka jingkit khlieh ba ki la shim hynrei kin pyrshang ban ai ïa kaba bhatam ïa ka lawei ki khun samla bad ka jylla kat kum ka bor kaba u paidbah u la pynkup.