Shillong, Ïaiong 19: U nongïalam ka BJP uba dei ruh u MLA ka Pynthorumkhrah u bah AL Hek ha ka sngi saitjaiñ u la tyrwa tiket ïa ka party sha u Chief Secretary barim ka jylla u bah Donald P Wahlang ban ïakhun ïa ka elekshon shiteng samoi ka ban sa long jong ka Shillong Lok Sabha.
“Nga la leit sha kawei ka prokram ba pynkup burom ïa u bah Wahlang bad nga la ong ba mynta ba u la shongthait, u laitluid ban trei, nga la tyrwa ban ai tiket ïa u ban iakhun ïa ka elekshon shiteng samoi ban wan lada u kwah ban ïakhun”, la ong u Bah Hek.
U Bah Hek u la kren ïa kane, hadien ba u la leit sha ka prokram pynkup burom ïa ka u Bah Wahlang kaba la pynlong da ka All Meghalaya Primary School Teachers Association ha Nongmensong ha ka sngi Saitjaiñ.
U bah Wahlang u la shong thait noh kum u Chief Secretary ka jylla Meghalaya ha u snem ba la dep.
Ka Shillong Lok Sabha seat ka sah thylli hadien ka jingkhlad noh jong u MP barim ka VPP u Dr Ricky AJ Syngkon ha ka 19 tarik u Rymphang.
Dang shen, u bah Hek u la pynpaw ruh ba u myntri ka kynhun myntri bad u nongthaw ain ka South Shillong u bah Sanbor Shullai u dei napdeng ki san ngut ki kyrteng kiba la ai jingmut sha ki nongialam jong ka party na ka bynta ka bye-election sha Shillong Lok Sabha ban wan, bad u la pynpaw ïa ka jingngeit skhem ba ka BJP kan jop ïa katei ka seat.
“Ngi la tyrwa ïa ka kyrteng jong u mynta ka kynti kum u nombar ba nyngkong eh.U (Sanbor) un long u kyrtong uba bit tam khamtam ba u long u myntri sorkar ban iakhun ïa kane ka elekshon MP.Namar baroh kin kyrshan ïa u bah Sanbor bad ngin pynthikna ba ngin trei shitom bha ban pynthikna ba un jop ïa ka elekshon mynta ka kynti”, la ong u bah Hek.
Da kaba pynpaw ïa ka jingsngewskhem, u Hek u la ong, “Khlem artatien, ka BJP kan sa jop ha kane ka elekshon shiteng samoi.”
