Twa sa ka Ïingdorbar Thaw Aiñ ba thymmai ka Jylla na ka jingkhyllem u dome

Shillong, Jymmang 22: Tang da ki bnai hashuwa ban otribon, ka Ïingdorbar Thaw Aiñ ba thymmai jong ka Jylla kala twa hynne ka sngi U Blei na ka jingkhyllem jong u dome (tnum shynrong pylleng) uba la shna halor jong ka hall ba shong dorbar ki Nongthaw Aiñ ka Jylla.
U Lamphang ka Ïingdorbar Bah Metbah Lyngdoh ula khot ïa ka jingïalang ba kyrkieh lashai ka sngi nyngkong ban iasyllok bad wad ïa ka daw halor kane ka jingtwa, kaba la pynmih ruh ïa ka jingkylli halor ka jingmut bad jing thmu ban buh ïa une u dome.
Kane ka jingjia kala jia hynne ka step phyrngap por 12.30 baje, ong ki Engineer ka PWD haba pyntip ba ym shym la don satia kano kano ka jingjia ba sngewsih na kane ka jingtwa namar ka jingbym don satia ki nongtrei ba treikam.
Ïa kane ka Ïingdorbar Thaw Ain ba thymmai ka Jylla la tei ha ka jaka ba heh kumba 80 acre ha Mawdiangdiang, New Shillong Township (NST)bad ïa kane ka project ba T. 127 klur la ai ban pyntrei sha ka kompani Uttar Pradesh Rajkiya Nirman Nigam Ltd kaba dei ka Public Sector Undertaking (PSU) jong ka sorkar Uttar Pradesh.
Haba ïakren bad ki nongthoh khubor hadien ka jingjurip, u Executive Engineer ka tnad PWD (Building) ba khmih ïa kane ka project Bah Ransom Sutnga ula ong ba kane ka jingjia ka dei kaba sngewsih naba ka Sorkar kala buh por ban pyndep ïa ka project hapoh u bnai Nailar mynta u snem khnang ba kan ïoh shong noh ïa ka Dorbar Synrai mynta u snem ha kane ka Ïingdorbar ba thymmai.
U Bah Ransom u pyntip ba ka Tnad PWD (Building) kum ka Tnad ba pynïaid ïa kam, kala pynthikna ba ka jingpyntrei ïa ka jingtei ka long kat kum ka jingpynwandur (design) bala mynjur, kaba la pynkhreh da ki Engineer bala pynbeit da ka Kompani bad bala mynjur ruh da ka IIT Roorkee. Dei haba pynshong nongrim ïa kane, ka Meghalaya Urban Development Authority (MUDA) kala ai ïa ka Building Permission.
U Bah Ransom ula ong ba ka jingkhia jong u dome kynthup lang ka minar, kaba kot haduh 70 ton, ka lah ban dei kawei na ki daw halor kane ka jingtwa bad bynrap “Hynrei ngam lah ban shu ong kumta namar ngim pat lah ban tip katno ka jingkhia ka dei ban long naba ngi la shna ïa u dome kat kum ka jingpynwandur. Ula kyntait ruh ba ka jingtwa kan dei na ka jingjur slap.
Une u Engineer ka PWD ula pyntip ba u Lamphang ka Ïingdorbar Thaw Aiñ Bah Metbah Lyngdoh ula khot ïa ka jingïalang ba kyrkieh lashai ka sngi ha Assembly Secretariat ban ïakren halor kane ka jingjia.
“Ngi sngew ba ka lah ban dei na ka jingpynwandur (design) hynrei ngim pat thikna. Ta ka daw ngin sa buh ïa ka kynhun ban pynthikna ïa kane. Ngin sa shong jingïalang lashai ka sngi ban ïakren bad ka Tnad ba pyntrei ïa ka project, ka Meghalaya Legislative Assembly Secretariat bad baroh ki kynhun ba leh ïa ka Design na Delhi, kiban sa poi lada ym dei mynta ka miet, lehse kin poi lashai mynstep” ula ong.
Hadien ka jingjurip, u Bah Ransom u pyntip ba ka Assembly Hall kala julor lut na ka jinghap jong u dome beit beit ha kane ka hall. Ula pynthikna ruh ba ki lynti ïaid sha ka Assembly Hall bad baroh ki lynti ïaid na ka diang, ka mon bad na pddeng jong ka Building kim shymla shah ktah satia na kane ka jingjia.
Haba pynpaw ba ka jingjulor ka lah ban kot ïa ka T. 5 klur, u Bah Ransom ula ong ba ïa kane ka pisa lah ban khate na u Contractor kat kum ka Contract Agreement khnang ba kan nym don ka jingpynlut biang na ka Sorkar Jylla.
Ha kajuh ka por, une u Executive Engineer ka PWD ula kubur ba hadien ka jingjia mynta ka sngi, ka jingpyndep ïa ka Ïingdorbar Thaw Aiñ ba thymmai ka Jylla kan nang shimpor biang.
“Ngin dang donkam sa phra bnai eiei ban pyndep ïa ka jingtei namar tang ban pynkhuid ïa ki lyngkhot lyngkhai kan shimpor haduh arbnai eiei ban ïoh sdang biang ïa ka jingtei ba thymmai” ula ong.