Tuid ki samla sha ka Meghalaya Day Run jong u DSO Ri Bhoi

Nongpoh K’Lyngkot 21: Ka ophis u District Sports Officer, Ri Bhoi District, ha ryngkat ka jingïatreilang bad ka ophis u Deputy Commissioner Ri-Bhoi District mynta ka sngi ka 21 tarik Kyllalyngkot kila pynlong daka jingïakop mareh marathon kaba la tip kum ka Meghalaya Day Run kaba jngai kumba 7km, ba la sdang naduh Lay Bye Market Dulongnar bad pynkut pat ha Indoor Stadium Umlyngkdait.
Ïa kane ka jingïakop mareh marathon la wan ban kaweh lama da u Abhilash Baranwal Deputy Commissioner Ri Bhoi District ha ka jingdon ryngkat u Bah Bobby L Nongbet DSO Ri Bhoi, lem bad kiwei kiwei. Ha kane ka jingmareh marathon la wan ban shim bynta shitrhem da ki samla bad rangbah na kylleng ka dong Ri-Bhoi.
Ïa ka nam lahduh ha kane ka jingmareh thong haka liang ki shynrang la rah da u samla Monas Bongrung, u samla Robinwell Kharbudnah haka kyrdan ba ar bad u Piku Nath u la wan ha kyrdan ba lai bad ha ka liang ki kynthei ka samla Sildaris Makri kala ïoh rah ïaka nam lahduh, ka samla Alisha Syngkli ha kyrdan ba ar, bad ka samla Shimtimon Lyngdoh ha kyrdan ba lai bad ki nongïashim bynta kiba la rangbah tam la rah da ka kong Sonra Rani haka liang ki kynthei bad u Pel Bey haka liang ki shynrang.
Kum ka jingpynshlur bad ai mynsiem ïaki nongïashim bynta naka liang ka ophis u DSO kala sam ruh ïaki khusnam ïaki nongjop haka jingrakhe ïaka Meghalaya Day ha District Library Nongpoh.