Da 2-1 kol pynkut ka Mawlai ïa ka 1st Leg jong ka Shillong Premier League 2024

Shillong, K’Lyngkot 21 : Ka kynhun ka la ba bat ïa ka nam lahduh, Mawlai Sports Club ka la pynkut ïa ka noh ïa ka kylla kaba nyngkong jong ka Shillong Premier League 2024 da kaba pynliem noh ïa ka Sawmer SC da 2-1 kol ha ka jingïakhun kaba itynnad bha kaba long ha kane ka sngi Ba-ar ha madan ïalehkai SSA, First Ground, Polo.
Haba phai sha ka jingïakhun, dei ka Mawlai kaba la ïoh ban pynkhih jar nyngkong lyngba u Damanbhalang Chyne ha ka minit kaba 42 jong ka kylla step kaba pynlong ïa ka kynhun ban lamkhmat da 1 kol ha ka kylla step.
Ynda la poi ka kylla miet ka jingïalehkai ka la nang itynnad khamtam haba ka Sawmer kala ïoh ban pynïakhaid ïa ka jingïakhun lyngba ka kol kaba la ïoh thep da u HIllford Lyngkhoi ha ka minit kaba 48. Hapdeng ka jingïalehkai kaba mar ïa biang bor bha, ka Mawlai kala ïoh biang sa kawei pat ka kol ha ka minit kaba 83 lyngba u Robertson Khongriah kaba kylla long artad ka kol kaba ai ïa ka rai jop ïa ka Mawlai ha kane ka sngi.
Kane kadei ka jingïakhun kaba khatduh jong ka first leg jong ka league bad ha ki 45 tylli ki jingïakhun ba ki klob ki la ïoh ban ïakhun mar khyndai sien. Ka Mawlai kaba la jop arsien ïa ka nam lahduh jong ka OC Blue SPL bad mynta ka dang ïakhun tyngeh ban khur ïa ka jingjop kaba lai sien, ka dei tang ma ka ka kynhun kaba khlem shah rem bad ka don 25 poiñ na ki 8 tylli ki jingjop bad ïakhaid shisien.
Ïa ka kyrdan kaba ar pat la bat da ka Shillong Lajong FC kaba don mynta 22 point, bud pat sa ka Rangdajied United FC kaba don 19 poiñ.
Ka jingïakhun ha ka kylla kaba ar lane ka second leg kan sdang ha kane ka sngi Balang ha kaba ka Nangkiew Irat SC kan hap ban ïakhun pyrshah ïa Rangdajied ha ka por 11:00 baje mynstep katba ka Nongrim Hills pat kan hap ban ïakhun pyrshah ïa ka Langsning FC ha ka por 2:30 baje janmiet.