Pynkhihwin ka Meghalaya Games 2025 ïa ka West Jaiñtia Hills baroh kawei

Ryngkat ki 3500 tam ki nongïalehkai kiba wan na ki 12 district jong ka Meghalaya

0

Jowai, K’Lyngkot 21 : Ka jingplie pyrda ïa ka lympung ïalehkai jong ka Meghalaya Games 2025 ha kane ka sngi Ba-ar ha Jowai ka la pynshongshit lut ïa ka rilum Jaintia baroh kawei namar kadei ha ka sien kaba nyngkong eh ba katei ka thain kan ïoh ban sakhi ïa ki lympung ïalehkai kiba heh jong ka jylla.
Ïa kane ka lympung ïalehkai kaba la wan shim bynta da palat 3,500 ngut ki nongïalehkai na ki 12 tylli ki distrik jong ka Meghalaya la wan ban plie pyrda da u Myntri Rangbah ka Jylla Conrad K Sangma ha ryngkat ka jingdonlang ki Symbud Myntri Rangbah ba kynthup ïa u Bah Prestone Tynsong bad u Bah Sniawbhalang Dhar, Myntri ka tnad Ïalehkai, Bah ShakliarWarjri, kumjuh kiwei pat ki Myntri Sorkar bad ki ophisar na ka tnad ïalehkai bad na ki tnad bapher bapher ha ka jingïalang kaba long ha madan Wahïajer, Jowai.
Kane ka lympung ïalehkai kaban don haduh 29 tylli ki jait jingïalehkai ban ïaknieh takma kadei ruh ka rynsan kaba plie lad ïa ki samla na kylleng ki distrik jong ka jylla ban pyni ïa ka sap kaba ki don ha ki jingïalehkai bapher bapher bad ruh ban rah ïa ka nam sha la ki distrik ba ki mihkhmat.
Kane ka Meghalaya ka long ruh kum shi bynta ka jingpynjanai ïa ka jingpynkhreh katba ka National Games 2027 kaba ka Jylla ka ïakhun ban ïoh pynlong ka la nang jan nang jan.
Yn sakhi ruh ha kane ka National Games ïa ki jingïalehkai tynrai kiba kynthup naduh ka Mawpoin, Rah Moo Khrah bad ruh ka An’ Ding Oka kaba pyni ïa ka jingthrang jong ka sorkar ban pynneh pynsah ïa ki jingïalehkai kiba don naduh ka por u mynbarim.
Haba kren ha ka jingïalang, u MyntrI Rangbah u la ong ba kine ki lympung kim dei satia tang ki lympung ïalehkai hynrei ki dei ruh ki lad ba ka sorkar ka plie na bynta ki khun samla jong ka jylla. U la ong ruh ba kum ka sorkar ki kwah ban pyntikna ba kum kine ki lympung ïalehkai yn pynlong na kawei ka jaka sha kawei pat khnang ba yn lah ban ïohi bad tip ïa ka jinglong jong kawei ka jaka sha kawei pat.
“Man ka thaiñ bad man ka distrik ki dei ban kiew lang bad ïoh ruh ïa ka kabu ban pynlong ïa kum kine ki lympung ïalehkai. Mynta ka sngi da kaba ïoh ban pynlong ïa kane ka lympung ïalehkai, bun ki kam pynroi ki la poi ha ka thain Jowai bad ka West Jaintïa Hills baroh kawei. Ka lah ban long naduh ki lynti syngkien lane ka jingpynbha ïa ki jingtei bad khamtam eh ki stadium kum kine,” u la ong.
Lah ruh ban kdew ba kane ka dei ka sien kaba nyngkong eh ha ka Meghalaya Games ba ki nongïalehkai ba don jingthut ha ki dkhot met kiba don hynñiew ngut, kata saw ngut ki kynthei bad lai ngut ki shynrang kin shim bynta ha ka para-shooting (pistol bad rifles).
Nangta ka jingpyntem ïa ka State Anthem ka la nang pynshongshit shuh shuh ïa ki nongïalehkai kumjuh ïa ki paidbah kiba wan ban sakhi lang ha kane ka sngi.
La pynshongshit ruh ïa kane ka sngi plie pyrda da ka jingrwai jong kane ka Games kaba ai kyrteng, “Niom Beit Naphang”.
Katba na ka liang u Myntri ka tnad Ïalehkai, Bah Shakliar Warjri u la kdew ïa ka jingnang kiew ki kam ïalehkai ha ka jylla bad ong ba kane ka urlong da ka jingïatrei lang jong baroh kiba pynurlong ïa kane ka Meghalaya Games.
U ong ruh ba ha ka jingïakhun ki don ki jingjop bad don kiba rem hynrei kiba kum kitei ki lympung pat ki long kum ka rynsan ïa ki samla jong ka jylla ban ïoh leit peit ruh ïa kiwei ki jaka kiba don ha kiwei ki bynta jong ka jylla.
“Ki la don kiba ïathuh ïanga ba bun na kine ki nongïalehkai ka dei ka sien kaba nyngkong eh ïa ki ban poi sha ka rilum Jaintia,” u la ong.
Shuh shuh u la pynpaw ruh ba ka thong jong ka sorkar ka long ba lyngba kine ki lympung, ki khun samla kin ïoh ruh ïa ka kabu ksiar wat ba kin khur takma wat ha ki rynsan ïalehkai jong ka Olympics ruh.
Lah ban kdew hangne ba ha ka Meghalaya Games 2024 kaba la wan ban plie da ka President ka Ri ka Droupadi Murmu ha PA Sangma Stadium ka la long kum u maw jingkieng na ka bynta ka jylla ha ki kam ïalehkai.
Kane ka 6th Meghalaya Games kan sakhi ruh ïa ki 1,600 tylli ki takma kiban ïaknieh ha ki hynriew sngi ha ki lympung ïakhun bapher bapher. Ïa kine ki lympung ïalehkai yn pynlong ha kylleng ki jaka ïalehkai kiba don ha ki bynta jong ka Jowai bad kiwei pat ki bynta jong ka distrik hapoh ka jingpynïaid jong ki 500 ngut ki nongpynïaid.
Na ka liang u President jong ka Meghalaya State Olympic Association (MSOA) u la pynpaw ka jingsngewkmen ban ïohi ïa ka jingwan shim bynta shitrhem jong ki nongïalehkai na kylleng ki bynta jong ka. U la ai ruh ka burom halor ka jingpyntreikam ïa ka Meghalaya Sports Policy 2019 bad ka jingpyntreikam ïa ki khusnam bad ruh ki schlarship na bynta ki samla nongïalehkai kiba la pynurlong hapoh ka jingïalam jong u Myntri Rangbah ka Jylla.
Ha kane ka sngi plie pyrda ïa ka Meghalaya Games la sakhi ruh ïa ka jingdonlang jong u Sardor Mirzayusupovich Rustambaev, Nongai ktien sha India na ka Embassy jong ka Republic of Uzbekistan, nangta ka Myntri ka tnad Health and Family Welfare, Dr. Mazel Ampareen Lyngdoh; MLA ka Jowai Bah Wailadmiki Shylla, Myntri ka tnad Power AT Mondal; Myntri ka tnad Revenue, Excise and Disaster Management, Bah Kyrmen Shylla, Myntri Food, Civil Supplies & Consumer Affairs Bah Comingone Ymbon, nalor ki MLA, ki ophisar jong ka sorkar jylla nalor kiwei kiwei kiba la don lang.

Leave A Reply

Your email address will not be published.