Tuh ki runar ïa ka music system napoh kali, shah byrngem ka longkmie

Shillong, K’ Lyngkot 30: Ka khubor ba la ïoh na ki pulit la ïathuh ba u Suraj Bastola u la phah ka jingujor ba hapdeng ka 26 bad 28 tarik mynta u bnai, ki runar bym lah ban ithuh ki la prong hapoh ka kali Maruti car jong u kaba don u nombar ML-10B-8181 bad ki la tuh ïa ka music system.
Ha kawei pat ka jingjia ki pulit ki la ïathuh ba ha ka 28 tarik mynta u bnai ha ka por kumba 5 baje janmiet ki shipai BSF jong ka BOP Umsyiem (EKH) ki la ïoh bat ïa 4 ngut ki nong Bangladeshi kiba kyrteng u Md. Onik ba la 29 snem, u Md. Dulal Hussain ba la 40 snem, u Md. Payel ba la 23 snem bad u Morsalin ba la 34 snem ka rta bad uwei u nong India uba kyrteng u John Gilbert Marweiñ ba la 29 snem ka rta bad ki la aiti noh sha ki pulit ban leh ïa kaba donkam.
Sa kawei pat ka jingjia u Coy Commander, G-Coy, 50th Bn., BSF u la phah ka jingujor ba ha ka 28 tarik mynta u bnai, ki shipai BSF ki la lap ba ka jingker sainar shiah ha khappud Indo-Bangladesh kaba dei ruh ka jingker kaba hapdeng ka BFL No. 42 shaduh sha 02, Picket No. 2030 bad 2031, kaba dang hab hapoh ka BOP Kalaichar (SWGH), ba la jot bad ba ka la don ka jingrung tuh.
Sa kawei pat ka jingjia, ki pulit ki la ïathuh ba kawei ka longkmie ka la phah ka jingujor ba ka la ïohpdiang shibun ki message hapoh ka WhatsApp na ki mobile number bapher bapher naduh ka 19 tarik mynta u bnai, 2025, ha kaba kiba phah ki la dawa pisa na ka bad ki la byrngem ruh ban pynjah burom ïa ka dur ka dar, ka jingtrei lada kam lah ban kohnguh ïa ki jingdawa jong ki.