Jowai, Nailur 09: Ka Bamkamar Myntoilang FC ka la jop ïa la ka jong ka jingïalehkai jong ka lympung phutbol phutbol (L) Joybell Suiam Memorial Football League 2026 haka kyrdan 2nd Division bala pynïaid da ka Thadlaskieñ Sport Association, ba la long hynne ka sngi Balang (09 tarik u Nailur, 2026) ha madan Wahiajer Multi Sports Complex Stadium.
Ki ar tylli kiwei pat ki jingïalehkai ha kane ka sngi ki la kut ha ka jingïakhaid.
Na ka liang jong ka Bamkamar Myntoilang FC, ka la lah ba kan pynliem noh da 3-2 kol ïaka Lumkynter FC ha ka jingïalehkai kaba nyngkong.
Ka Bamkamar MFC ka la hap ban wanphai ar sien ha ka jingïakhun shuwa ban khur ïa ka jingjop hadien ba ka Lumkynter FC ka la lamkhmat ar sien lyngba u Plilad Dkhar (13’) bad u Tesmi Lyngdoh (33’) hynrei u Isaiah Suting (29’) bad u Batskhem Suting (51’) ki la pynïakhaid ha baroh ar tylli ki khep shuwa ba u Armiki Suting un thep ïa ka namtam ha ka minit kaba 61.
Haka jingïakhun kaba ar ka Mynkrem SC bad ka Lummuriap SC ki la ïakhaid da mar 1-1 kol. Ka Mynkrem SC ka la pynkhihjar nyngkong lyngba u Rostar Khynriam (26’) hynrei ka Lummuriap SC ka la pynïakhaid noh lyngba u Overcome Nongrum (47’).
Kumjuh ruh, ha ka jingïakhun kaba bud, hapdeng ka Moddymmai SC bad ka Madur SC, ka la kut ha ka jingïakhaid, ha kaba baroh arliang ki la thep mar 2-2 kol. Ka Moddymmai SC ka la pynkhihjar lyngba u Philamon Nongpluh (9’) bad u Max Laloo (14’), katba u u Tyllilang Phawa (21 & 34’) u la thep ïa baroh ar tylli ki kol na ka bynta ka Madur SC.
La pyntip ba ki jingïakhun ha kane ka sngi Palei (10/09/2026) ki long: Por 10 baje mynstep ka Mainroad SC Wahiajer pyrshah ïaka Maia Club SC Wahiajer, haka por 12 baje mynsngi ka Tympang SC pyrshah ïaka Mukhla Sohshrieh SC. Katba haka por 2 baje nohphai sngi ka Goodwill SC Mupliang pyrshah ïaka RC Dreaming Mupliang.
