Mawkyrwat, K’lyngkot, 20: U Deputy Commissioner jong ka South West Khasi Hills District u la buh ïa ki jingpyrkhing ha shwa ka General Elections sha ka Meghalaya Legislative Assembly ka ban long ha ka 27 u Rymphang, 2023.
Ha kajuh ka por u la pynbna ba ka Model Code of Conduct bad kiwei pat ki jingbthah jong ka election commission ki la treikam hapoh ka distrik bad na ka bynta ban wanrah ïa ka jingïaidbeit ïaidryntih ha ka por elekshon la pyntreikam ïa ka Code of conduct and Prevention of Defacement of Public bad ki Private Properties hapoh ka distrik.
Namarkata, u Deputy Commissioner u la buh ïa ki katto katne ki jingmana hapoh ka Section 144 CrPC ha kaba la khang bad mana ïa ki jingthoh ha ki kynroh, ka jingtah ïa ki posters/ki kot lane kano kano ka jingpynjulor ne ka jingpynïeng, ka jingpyni ïa ki cut outs, ki hoardings, ki banners, bad kiwei kiwei ha kino kino ki jaka paidbah. Yn ym shah ïa ki political party ne ki kyrtong ban wah ïa ki banner ha baroh ki lynter surok ne kino kino ki lynti shnong.
La khang bad mana ïa ki jingthoh ha ki kynroh, ka jingtah ïa ki posters/ki kot lane kano kano ka jingpynjulor ne ka jingpynïeng, ka jingpyni ïa ki cut outs, ki hoardings, ki banners, bad kiwei kiwei ha kino kino ki jaka jong ki riew shimet ne ki kynroh jong ki riewshimet khlem da ïoh ïa ka jingpan jingbit na ki trai ïing bad khlem ka jingmynjur na ka office jong u District Election Officer.
Yn ym shah ïa ki jingïalang ne ki meeting election khlem da ïoh ïa ka jingbit na ka ophis jong u District Election Officer bad kumjuh ruh na ki Rangbah Shnong ha kaba ïa dei bad ka jaka jong ka jingpynlong ïa ka jingïalang ne ka meeting. Yn ym shah ban pyndonkam ïa ki tiar pynsawa hapdeng ka por 10 baje mynmiet haduh ka por 6 baje mynstep. Lada ïa ki jingpynsawa bad ïa ki tiar pynsawa la pyndonkam khlem da ïoh jingbit na ka ophis jong u District Election Officer ïa kita ki tiar yn sa wan kurup noh da ki bor jong ka aiñ. Yn ym shah ïa kino kino ki jingïa-ïaid paidbah ne ki rally khlem da ïoh jingbit na u District Election Officer.
Kane ka jingmana kan treikam noh mardor tad haduh ban pyndep ïa ka election.
