Nongstoiñ, K’lyngkot, 20: U Bah K.P.Pangñiang President rangbah ka Hill State People Democratic Party, u ba dei ruh u kyrtong jong ka Rambrai Jyrngam Constituency, mar shu bna ba ka Election Commission jong ka ri India ka la pynbna ba ïa ka election ha kane ka jylla yn pynlong ha ka 27 tarik jong u bnai Rymphang, na ka liang jong u mar mar ha ka sngi palei ka 19 tarik Kyllalyngkot, u la lum ïa ki nongkyrshan na ka polling station jong u ha Tynghor.
Ha katei ka sngi la pynlong ïa ka jingïalang ha madan jong katei ka shnong, ha kaba la pynïaid da u bah O.Myrthong sordar shnong ha ryngkat ka jingïadonlang jong ki katto katne ngut ki nongkitkam jong ka party na ka ri Muliang zone, ki rangbah bad ki longkmie. Ha katei ka sngi ki longkmie ryngkat ki khunlung ha ka met, ki la ïatuid sha katei ka jingïalang bad ïatur ban pynrung kyrteng bad ban pynïasoh kum ki nongkyrshan ba pura.
U bah Pangñiang u la ong ba ka jinglum jong u ïa ki nongkyrshan tang na kitei ki lai tylli ki polling station, ka long ba u sngewthuh ba shuwa ba un mih madan sha kiwei pat ki jaka ban pan ïa jingkyrshan na ki paitbah u hap ban sdang shuwa na la ïing. Namar ki lad ban kyntiew ïa u briew ha kano kano ka kam, ka dei ban sdang na la ïing, namar lada hapoh ïng kam don ka jingïatylli bad ka jingïatreilang, kan ym lah ban poi sha ka thong wat ha kano kano ka kam ruh.
U la ong ba ka jingthmu jong u ban ïaleh biang ïa ka election kam dei ba u kwah hi. Hynrei ka dei ka jingkyrpad jong ki nongkitkam bad ki nongkyrshan baroh ba u dei ban ïaleh biang sa shisien, namar ki paitbah bad ka constituency ki dang I donkam ïa u.
Ha kajuh ka por u la ong ba u la pyrshang ban pynsngewthuh ïa ki paitbah ba ka jingshah rem bad ka jingkyntait jong ki paitbah ha ka election ba la dep, ka lah ban dei ba ha ka jinglong nongmihkhmat jong u, ki don ki jingduna, ki jingbakla kiba long ki maw jynthud ïa ki paitbah. Hynrei ha kane ka kynti u da kyrpad ba lada ki don kiba kum kita, kin ïaklet noh bad kin ïa kylla kaba mut na ka bynta ka jingbha jong ka lawei.
