Shillong, K’lyngkot 18: Hadien ba ka Election Commission of India ka la pynbna ïa ka tarik jong ka elekshon MLA kaban long ha ka jylla, ki kyndon jong ka Model Code of Conduct (MCC) kin treikam baroh kawei ka jylla.
Na ka liang u Chief Election Commissioner (CEO) jong ka jylla u Bah FR Kharkongngor ha ka hukum ba la pynmih la maham ba yn ym shah ban pyntreikam bakla ïa ki kali sorkar, ka jingpynbna paidbah ban lut na ka pisa ka sorkar, la maham ba ym dei ban buh ha ki official website ka sorkar ïa ki jingïalang party, ym shah ruh ban pynkynriah ïa ki ophisa ne ban thung kam thymmai bad kine ki adong kin treikam tad haduh ban da kut ka elekshon.
Shuh shuh na ka liang u DC ka East Khasi Hills u Sibhi Chakravarthy Sadhu u la pynjari ïa ka kyndon 144 CrPC ha East Khasi Hills District.
Ha ka hukum la khang ïa baroh ha ka district ban rah pisa palat ïa ka 50 hajar tyngka khnang ban ïada na kano kano ka jingthied vote ne pynbam pisa ïa ki nongjied da ki party bad ki kyrtong.
Ha ka hukum la mana ba ki seng bhalang ne kino kino ki kynhun ne riew shimet ban pynlong ïa kino kino ki jaid prokram jingïakhih ha ka distrik baroh kawei.
Shuh shuh u DC u maham ba ki kyrtong bad ki seng saiñ pyrthei kim bit ban dro kino kino ki jingdro ha ki kynroh ne ban tah ïa ki poster ne ki kot, ki hoarding, ki baner ha ki jaka ne kynroh shimet khlem da ïoh jingbit ba ai da ki jynthoh na ki trai bad khlem ïoh jingbit shuwa na ka ophis jong u. La maham ruh ba ym bit ban buh ki poster ha ki surok bad ki lynti.
La maham ruh ba ym bit ban pynlong ïa kino kino ki jingïalang ïalap elekshon khlem da ïoh jingbit na ka ophis u DC bad khlem ka jingai jingmynjur lang u Rangbah Shnong. Shuh shuh la maham ba ym bit ban pyndonkam tynghung ne kor pynsawa ban ïalap elekshon naduh ka por 10 baje mynmiet haduh ka por 6 baje mynstep.
U DC u maham ruh ba kino kino ki kyrtong bad ki party kiba ïalap elekshon da ki tynghung bad ki kor pynsawa khlem da ïoh jingbit na ka ophis bad u Rangbah Shnong bad lada don kiba leh pyrshah yn knieh shi syndon ïa ki kor pynsawa.
