– R. Bilcarson
Shillong 18,K’lyngkot : Ka samoi election sha ka Meghalaya Legislative Assembly ka la poi, ki party ne ki kyrtong shimet ki la sdang ban duhthiah duhdem namar ba la thnem ka ïew ïadie ïathied. Ki nia election ki la pur khana ha ki ïingïapbriew, ha ki madan football, ha ïew ha hat, ha ki ophis sorkar, ophis shimet bad ha ki dukansha ban pynsngew ïa la kajong kajong ka nongrim ba ki kyrshan.Kampher la ka dei ka party trai-ri, party rilum, ne party rithor, ki paidbah ki la sdang ban pynksan ïa la u jong u kyrtong.
Hynrei,ha kane ka kynti na baroh ki 36 tylli ki Constituency jong ka Khasi-Jaintia, ka Nongkrem Constituency ka dei kaba ki briew ki peitngor bad ki duriap bha. Ka daw ka long ba nalor jong u sitting MLA, la wan kynthih diengkper sa uwei pat u sitting MLA na Mawhati ban ïa kawang tupia ha lympung jingïaleh. Nangta, nalor kiwei pat, kaba kham ibang shuh shuh ka long ba u Bah Ardent Miller Basaiawmoit u MLA barim jong ka Nongkrem uba la jop ar samoi un syndongkti lem ban ïakhun ha lympung kum u khun lymboit lymbiang uba la phla shynna sha ki paidbah ba um don spah um don hajar ban thong ne ban pynbieij ïa ki paidbah hynrei tang ha ka nongrim kaba shisha na ka bynta ka lawei baphyrnai jong ki khun samla bad ki pateng ba hadien habud.
Une u rangbah u kwah ban pynshisha hakhmat jong ki paidbah jong katei ka Constituency ba ka Hok ka Sot kan ïeng rasong sashisien khlem jingpynthame. Ka jinglah jong utei u rangbah ban khring paidbah ha kine ki khyndiat sngi ha Polo bad ha Smit palat ban ïa ka party NPP ba synshar, ka la nang pynklang shuh shuh ïa ka mynsiem ieit ri khlem sbai rupa. Kumta, haba utei u rangbah u la ïohi ba kiwei ki party kiba u ïasoh mynshwa kim lah ban shim rai wat la ka lieng jong ka jaidbynriew ka ngam noh ruh, um banse ban seng da la ka jong ka party thymmai ryngkat bad ki Lecturer, ki Professor bad kiwei pat ki Lyndan ki Kynrem ki khraw pyrkhat ha ka kyrteng ka Sur u Paidbah ne ka Voice of the People Party (VPP). Kane ka party ka long kum ka theisotti kaba dangkhuid dangsngur ryngkat bad ka jingthmu ban rat dyngkhong ïa ki kam thok kam shukor ha ka synshar khadar kaba u paidbah u long tang kum ki ‘langkñia jong ki Heh saipan.
U Bah Ardent u la dep ban pynshisha ïalade ha ki arterm ba u long u briew uba khuid, uba lait na ka bamsap bamklop ïa ka tyngka u paidbah. Katba u ïoh na ka MLA Scheme katta hi ruh u ai jingkheiñ ha khmat u paidbah haba shai ba shit khlem klop wat shi ana ruh. Katei ka mynsiem
ka kyrsoi ha u naduh ka election ba mynshwa eh ba u leit ïalap ha kylleng ka Ri lyngba ka “Clean Politics Campaign”. Hynrei, ym baroh khoit ki para MLA jong u ne ki saheb sorkar kiba sngewtynnad ïa ka jingleh jong u ban sam grant sha ki paidbah 100 na ka 100, namar phi la tip hi ba kiwei ki don ka sapbam.
Ka jingther jong u ban kren paidbah ha Smit pyrshah ïa kito ki kyrtong kiba la sam peisa, sam blanket bad sam tiarshet tiartiew lypa da kaba ki nongïalam jong kita ki kyrtong ki ong nadien nadien, haba la shim te hap ban pyrkhat em (kaba mut hap vote) ïa ki. Nangta, u buh jingkylli ruh hato u briew u ïa ryngkat dor mo bad ka syiar ka sniang bad ki blang ki masi ba un shu shah thied ban lilam ïa ka muhor sansnem jong u. Ban pyllait mraw na ka jingsur matlah ka sbai rupa, kane ka dei ka jingphrang ba mehding ïa kane ka Constituency, hooid wat ïa kiwei ki constituency ruh kumjuh. Ha ka election 2018 kawei na ki jingkren ba pawnam jong utei u rangbah ka long, “leit te leit bamphlang kylleng kylleng kam lei lei hynrei ynda la miet, wan thiah ha sem lajong” haba u thew pharshi ïa ka peisa ïohei.
Ka mynsiem ieit ri ka sdang ban klang lyngba ka jingïalap election jong u, ban pynshisha ba ka VPP kam dei satia ka Very Poor Party kumba la kren beiñ da mano re hynrei ka pynshisha pynban ba ka dei ka Very Popular Party ha ki paidbah khamtam ha ki thap ki dab, ki paid kupknup kuptrap, ki kup shiliang ki sem shiliang kiba dang ri ïa la hok ka burom. U Paidbah u pynshisha ïa kane da kaba ki la noh synñiang kaba la jan kot sha ka Arlakh tyngka tang ha kawei ka rallly ban pynpaw pyrthei haduh katno ka mynsiem jong ki ka pluh bad ka rhem ban kyrshan ïa ka VPP.
Haba sdang jong ka lyer election bun ki briew ki pyrkhat kumno keiñ u Bah Ardent un ïa aireng bad ki heh saipanï. Hynrei haba ka election campaign ka la ïaid, ki briew ki la nangshai nangshai haba ki la sngewthuh ïa ka nongrim ba ka VPP ka ïeng ban da ïa ka Ri bad ka Jaidbynriew. Hynrei kumba long mynta, katba nangrep katta nangsyrdep. Balei ?. Ka daw ka long ba kiba ïohnong dei kita ki H/L ne ki High Level. Ka peisa ka Jylla ka tuid kum ka dud ka ngap sha uwei ne ar hynrei ym sha ka saiñdur ïa ka Lawei jong ki paidbah. Bunsien, haba dang shu dep ba thaw sorkar,ki paidbah ki lah ban ong “isshh” kane te imat ka dei ka sorkar kaba kyntiew shisha ïa ka ïoh ka kot bad ka Lawei ki khun samla. Hynrei shwa ban kut ka sansnem, ki dak jingjot ki paw pyrthei bad kiba apkhmihlynti ki kut ha ka jingnohmynsiem bakhraw namar wat tang shi powa kam poi sha ka thong.
Haba phai lei lei sha ka survey jong ki Agency kum ka India Today bad kiwei, ka jylla Meghalaya ka wan ba ar na sha tdong, la ha ka pule dangle, ha ka rep ka riang, ne ha ka kamai ka kajih. Kiew khlemraiñ sa ka jingïohlok khynnah, mih sa ki jait jingpang namar bymbiang ka bam ka dih, kiew sa ka jingbun ki khunrei khlem kpa. Ym dei ba kren beiñ hynrei lada phi duriap bha baroh kine dei namar bym don ka sorkar ba pynshlur ha ki kam pynroi pynpar ha salonsar.
Dei halor kane ka nongrim, ki paidbah ka Nongkrem Constituency bad ka Jylla hi ki i ba u Bah Ardent un dei uwei u ban pyllait mraw (Moses) ïa ki khun samla ki bym don direction shano kin leit. Bun ki briew ki ngop ha ka magic jong ka sansnem tang ha ito i shitaiew shwa ban ïathep vote. Imat dei hangta ba ki shah shoh tyndep ban lilam wat ïalade kha ma kha. Uba bei sbai rupa ynda u la jop ruh un patiaw lei ïa kito kiba u la dep thied, hynrei un imsngi ban buria bin pa bin ia la ka jinglut jingsep bad kumno ban multiply da ka 1000 shah ïa kaei kaba u la pynlut khnang ba kiba ha ïing ha sem jong u kin roi kin par ban ia kiwei. U Bah Ardent um salia ban hiar wat na ka shuki CEM jong ka KHADC ban lait na ki kam jingpynsngewbha ïa kiwei khlem ka nongrim bashisha. Ka jingshahrem jong u tang ha ki arphewkhlieh ha ka election ba la dep ka nang pynskuiñ shuh shuh ban un trei hok wat la um long nongmihkhmat ha kane ka samoi ruh. Kumta, kane ka election 2023 kan dei ka test ïa ka Nongkrem Constituency, la kan beh rongphong ne kan kdup ïa ka thymmei jong ka Hok ka Sot, to ngin sa ïapeit. Ka por hi kan sa batai.
(Phi lah ban pathai kyrwoh bad u nongthoh lyngba ka carsonbil@rediffmail.com )
