Ki paidbah ka Meghalaya ki dei ban ai jingsneng ïa ka BJP kumba leh ki Bengali ha Bengal: Vincent Pala

Shillong, K’lyngkot, 17: Ka seng Congress ha ka sngi Baar ka la kyntu ïa ki paidbah nongthep vote jong ka Jylla Meghalaya ba ki dei ban ai jingsneng ïa ka Bharatiya Janata Party (BJP) ha ka elekshon ka ban sa long halor ka jingbyrngem ba yn ym don mano mano ruh ba lah ban thaw Sorkar khlem jingkyrshan jong ka BJP.
U President jong ka Meghalaya Pradesh Congress Committee (MPCC) u Bah Vincent H. Pala ha ka jingïakren bad ki lad pathai khubor u la ong ba kane ka jingkren jong ki nongïalam ka BJP ka long kumba ka pyrshang ban byrngem ïa ki paidbah ka jylla Meghalaya.
“Namarkata, ki paidbah ka jylla Meghalaya ki dei ban bud nuksa na ki Bengali ha West Bengal. Haba ka BJP ka la byrngem ïa ki Bengali ba kin ym lah ban thaw Sorkar khlem ka BJP, ki la ai syndon da ka jingsneng. Ki paidbah ka jylla Meghalaya ki dei ban ai jubab ïa ka BJP khnang ba kan ïohi ba ngim dei ban shah thom ha ka jingbyrngem jong ka BJP,” ong u Bah Pala.
Ka BJP ka dei ka seng saiñpyrthei kaba ïatreilang bad ka NPP kaba ïalam ïa ka Sorkar Meghalaya Democratic Alliance (MDA).
U MP ka Seng Congress na Assam u Gourav Gogoi haba bynrap halor kane u la ong ba ka BJP ka shu kren baheh hynrei ha ka jingshisha na ki lai tylli ki elekshon ba la long ha Delhi, ha Gujarat bad ha Himachal Pradesh ka BJP ka jop tang ha Gujarat.
U la ong ba ka BJP ka pyrkhang ba ka pisa ka lah ban thied ïa ki vote hynrei ka Congress ka ngeit ba ka jingtrei shitom ka wanrah ïa u soh ka jingjop.
“Namarkata, ngi sngewskhem ba ki jingtrei jong ngi haba ïa nujor bad ki jingtreikam jong kane ka Sorkar ba mynta, ki paidbah ki lah ban ïohi ba ka Sorkar Congress ka kham trei bha shikatdei eh na ka bynta ka lawei baphyrnai jong ka Jylla Meghalaya,” u la bynrap.