Shillong, Jymmang 14: Ka jingñiew vote ha Sohïong Constituency ha ka sngi Saitjaiñ ha kaba u Pyrsa jong u Bah HDR Lyngdoh u Bah Synshar Kupar Lyngdoh Thabah u la ïoh ïa ka jingjop pyrshah ïa u kyrtong ka NPP u MLA barim ruh ka Sohïong u Bah Samlin Malngiang, ha kaba u Bah Synshar u la tam da 3422 vote.
Haba u Mawphor u la ïoh ban ïakren bad ki katto katne ngut ki nongkyrshan ka UDP ki la pynpaw ba ka jingkyrshan jong ki ïa u kyrtong ka UDP ka daw hi ka dei namar ki don ka jingieid ïa u bah HDR Lyngdoh uba ki ju khot ieid u Maheh.
“Haba u Maheh u la khlad noh na ka liang ka ïing ka la rai ban sei da u pyrsa jong u, kumno ngin lah ban ieh ïa ka ïing u Maheh ha kum kane ka por ba ki donkam ïa ka jingkyrshan jong ngi bad namar ba u Maheh u la leh bha palat ïa ka Constituency ngi hap ban ai khublei khatduh da kaba pynjop ïa u pyrsa jong u,” ong kawei ka longkmie.
Shuh shuh kawei ka longmie ka la ong ba wat la u Bah Sysnar u la ïaleh pyrshah ha u snem 2018 pyrshah ïa u Bah HDR Lyngdoh, “hynrei naduh shuwa ba i Meheh in khlad i Bah Pope(Synsharlang) i la rai ban kyrshan ïa i Maheh bad da ka jingshim noh ba klydit u Blei ïa i Maheh ka jingkit khlieh kaba ki bynshet ka dei ha i bah Pope ngi kum ki nongkyrshan i Maheh ngi hap tynrong lem da kaba pynjop donburm,’ ka la ong.
Haba u Bah Synshar u kren sha ki lad pathai khubor hadien ba la pynbna ba u la jop na ka liang jong u ruh u la kubir ba ka jingjop bad ka jingtam kput pyrshah ïa u kyrong ka NPP ka daw hi ka dei namar ba ki paidbah ki ieid ïa u Maheh.
Shuh shuh haba u Mawphor u la ïakren bad u khun jong u Bah HDR Lyngdoh u Bah Nathaniel O Rymmai ua la kubur ba ka jingtrei kam ka vote sngew synei, “Haba don mano mano ba khlad kan don beit ka jingsngew synei kat ïa i pa lei iba la trei kum u MLA la 25 tylli ki snem kan don beit ka jingsngew synei,” u la ong.
Lah ban kdew ba na ka liang ki nongïalam ka UDP naduh kaba sdang hi ki la kam ba ka vote sngewsynei ha Sohïong kan trei kam bad shisha ka jingjop u Bah synshar nalor kiwei pat ki daw ka vote sngew synei ka ladei kawei napdeng kita.
