Shillong, K’lyngkot 09 : U Myntri Rangbah ka Jylla Conrad K. Sangma ha ka sngi Palei, u la ong ba ki jingbym don ki jingdonkam ba kongsan kiba dei ban don , ki dei ki diengpyngkiang ïa ka jinglah ban kiew jong ka rep ka riang bad kiwei ki kam pynmih mar ha kane ka thaiñ Shatei Lam Mihngi.
Haba kren ha ka jingrakhe Jubili Ksiar jong ka Indian Council of Agricultural Research (ICAR) ha Umiam, ula kyntu ïa ka Sorkar Pdeng ban pynkhlaiñ jingïarap ïa ki lad pynïasoh bad ki jingdonkam ba kongsan hapoh ka thaiñ.
“Ka thaiñ Shatei Lam Mihngi ka lah ban dei jaka pdeng ha ka kam pynmih jhur, ki mar rep ba khlem ai dawai sboh, tit, shynrai, sying bad ngap jong ka Ri, hynrei namar ki jingbym biang ki tiar ki tar, ki kor ki bor kibalong ki jingdonkam ba kongsan, ngim shym la lah ban pyndonkam pura ban pynïaid ïew bha ïa ki mar ba ngi pynmih na kane ka thaiñ” ula ong.
Ula pyntip b aka thaiñ ka pynmih ïa ki jait marrep kiba bun jait, kiba lah ban shalan sha kiwei pat ki sor hapoh ka Ri. Hynrei, namar ka jingbym don ki Cold Storage bad kiwei kiwei ki jingtei ba donkam, ban ym pyut kloi kine ki mar ym shym la lah ban shalan ha ka rukom kaba dei. Wat hapdeng kine ki jingeh, kiba bun ki mar na Meghalaya kila ïoh ïa ka ïew ha dewbah Europe bad ha UAE khamtam u sohtrum, sohñiamtra, sying bad u shynrai.
Ula pyntip ruh ba ka Sorkar kala trei ban pynkhlaiñ ïa ka kam rep kam riang da kaba kyrshan ïa ki nongrep lyngba ki prokram bapher bapher bad ban kyntiew ïa ki nongrep ba sengkam lajong ha ka rep ka riang.
Haba ïaroh ïa ka jingpyrshang ka ICAR ban pynlong ïa ka jingwadbniah kat kum ka juk ha ka rep ka riang, ula ai khublei ïa ka ICAR halor ka jingrakhe bad pynshlur ruh ba kin nang ïai bteng ban kyrshan ïa ki nongrep hapoh ka thaiñ.
Ula ban jur ruh ïa ka jingdonkam ban ïatreilang hapdeng ka ICAR bad ki bor Sorkar ban wanrah ïa ki buit rep kat kum ka jingwad bniah sha ki nongrep ban lah ïakhun ïa ki khniang jingpang bad kiwei kiwei ki jingeh. Ula kdew ïa ka jingpyut jong ki shylluid ba ktah ïa ki diengkwai, kaba la pynjulor bun ïa ki jingthung bad ktah jur ïa ka kamai ka kajih ha kylleng ki bynta jong ka Jylla.
Ha kajuh ka por, u Myntri Rangbah ula kyntu ïa ka Sorkar pdeng ba kan pynpoi ïa ka Krishu Vigyan Kendras (KVK) sha ki shnong ki thaw, ka ban pynkupbor ïa ki ba kin shim rai bad pyntyllun shakhmat ïa ka kam rep kam riang.
Ka President ka Ri India Droupasi Murmu kala ai jingkren ha kane ka jingïalang lyngba ka khubor ba shu record, naba kam shym la lah ban wan hi dalade. U Lat ka Jylla CH Vijayashankar, u Myntri ka Tnad Agriculture ka Sorkar Pdeng Shivraj Singh Chouhan bad ka Myntri kam rep ka Jylla ka Dr Ampareen Lyngdoh, kila ïadonlang ha kane ka jingrakhe.
Haba ai jingkren, u CHouhan ula ban jur halor ka jingdonkam ban don ka jingïatreilang hapdeng ka ICAR, ki Sorkar Jylla bad ki Agriculture Universities ban thaw ïa ki buit treikam bad ki lad ki lynti kiba ïadei bad ka jingdonkam jong ki nongrep.
