Shillong, Kyllalyngkot 8 : Ka United Democratic Party (UDP) ka la ther tyngeh kylla ïa ka Voice of the People Party (VPP) halor ka jingkynnoh ba ka dei ka party shim kabu.
“ Ban ong ba ngi dei ka seng shim kabu bad ba ngi long kine ne ngi long kitai ka long ka bym lah ban long da lei lei ruh. Phi dei ban tip bad sngewthuh shaphang ka rukom treikam ha ka riti synshar paidbah bad phi dei ban sngewthuh kumno ka saiñ pyrthei ruh ka treikam” ong u Gneral Secretary ka UDP u Dr Jemino Mawthoh.
U la kren ïa kane halor ka jingkynthoh kaba lamih na u nongpathai khubor ka VPP u bah Batskhem Myrboh uba kynnoh ba ka UDP ka dei ka seng shim kabu bad ka leh hok bha wat la ka dei kawei na ki seng saiñ pyrthei ba ïa synrop lang ha ka sorkar MDA ba la ïalam ka NPP.
U la ong tang namar ba ka VPP ka don ha ka Liang Pyrshah kam lah ban shu kawang ktieh katba ka mon ïa ka UDP.
“ Kaei kaba jia hadien ka election MLA 2023 hato ym dei ba ka VPP ka kwah ban thaw sorkar bad baroh ki seng saiñ pyrthei lait noh ka NPP. Hato kata ka lah ban long? Phi kynmaw ïa katei?, hato ka lah ban long? naduh ka TMC, Congress, VPP, HSDPSP, UDP, NCP, kynmaw bha ïa kiei kiei tang namar ba phi don ha ka Liang Pyrshah phim lah ban leh katba phi mon.
U la ong shuh shuh ba ka UDP baroh shi katta ka pyrshang ban leh ïa ka bynta ban tei ïa ka lawei jongka jylla. “ Ngi im ha ka juk jongka saiñ pyrthei khleh khaw lang bad haba ki paidbah ki ai ïa kum kata ka rai ngi hap ban ïa ïaid lang kumta. Ka dei ka rukom hi ruh kumta ha ka jingïathaw sorkar synrop lang katba ka jingïasngewthuh jingmut bad jingïatrei lang ka long kaba beit, ym don kaba kum kata”
“ Tangba tang kawei ki nongïalam ka VPP ki dei ban tip ba ngim ju shim kabu namar haba ngi ïohi ba ka sorkar ka ïaid bakla ngim ju sngap hynrei ngi pyni bad pynbeit ïa ka sorkar ym dei tang ïa ka sorkar hynrei wat ïa ki MLA jong ngi ruh bad kata keiñ ka dei ka synshar paidbah kaba khuid ba suba” ong u Dr Jemino.
U la ong ba ka UDP ka dei ka ïing kaba ïatylli namar baroh ki MLA bad ki MDC ki ïalong kawei lait noh tang kito ki bym dei ki UDP naduh ba sdang. Ki MLA jong ngi kim khih shane shatai. “Hooid ki don ki jingduna jingbakla ha man la ki seng saiñ pyrthei hynrei ngi pyrshang ban ïapynbeit ïa kita ki jingïapher jingmut da kaba ngi ïa ai jingmut bad ïatrei lang bad kata ka dei kaba ngi ïai bteng ban leh”.
Lada phi ong ka seng shim kabu ha kano ka rukom phi kynnoh shim kabu. Shu buh lada ka VPP kam poi sha ka thong ban ïoh synshar marwei bad ka hap ban ïatrei lang bad no bad no yn khot kumno ïa phi ha katei ka por. Lada ngi ïadon bynta ha ka synshar khadar bad ngi noh synniang sha ki paidbah balei ym leh ïa kata, tangba kam mut pat lada ngi ïadon ha ka sorkar synrop ngin sngap beit lada leh bakla ka sorkar ruh. Ngim shu sngap jar” U la pynkynmaw ruh ïa ki mat ba ka UDP ka la leh halor ka tnad kam pohïing bad ka tnad pynmih bording
U la ong shuh shuh kumno phi ïohi halor ka jingjied kyrtong ka VPP, Hato ka jingleh ka VPP katba ka mon shiphang la ai tiket shiphang la knieh noh ka long kaba dei? Kaei ka rukom jied kyrtong jongki?. “Nga ïohi bun ki jingbym ïahun halor ka jingjied kyrtong jongki hynrei ngim ju kdew kti namar ka dei ka kam pohïing jongki hynrei ngi pat kum ka party haba ngi jied ngi buh hakhmat ïa ka mon u paidbah” pynkut u Dr Jemino.
