La kham pynjynsur ïa ka por ban ïaid ki kali heh na surok NH-6 ha East Jaiñtia Hills

Khliehriat, K’lyngkot, 09: Na ka daw ba ka jingpyntrei ïa ka surok National Highway-6, ha ka thaiñ Narpuh, East Jaiñtia Hills District, u Deputy Commissioner jong ka East Jaiñtia Hills District uba dei ruh u Chairman jong ka District Disaster Management Authority (DDMA) ha ka 4 tarik, Nohprah 2024 u la pyntip ba la shah ban ïaid ïa ki kali heh naduh ka por 7:00 baje mynstep haduh ka por 3:00 baje janmiet bad ha ka 9 tarik, Kyllalyngot, 2025 la pynbna biang ba la kham pynjynsur ïa ki kynta ban ïaid ki kali heh kata naduh ka por 9:00 baje mynstep haduh ka por 3:00 baje noh phai sngi, kata naduh ka Lah Sngi u Blei haduh ka sngi Saitjaiñ.
La khang ban ïaid ki kali heh hapoh kitei ki kynta namarba ka jingpyntrei ïa ka surok naduh Lumshnong terter shaduh Malidor ka dang ïaid shaid shaid bad khnang ba yn lah ban pyndep kloi ïa ka jingpyntrei ïa ka surok ha katei ka thaiñ.
Hapoh kitei ki kynta ba la khang ban ïaid ïa ki kali, yn shah ban ïaid tang ïa ki kali kit nongpang bad kino kino ki kali kiba donkam kyrkieh bad kiba la ïoh jingbit.
La bthah ïa kiba ñiah kali ba kin bud ïa ki kyndon bad ki aiñ ñiah kali bad ban kohnguh ïa ki Pulit ba pynïaid kali.
La pynkynmaw biang ruh ba kiba ñiah kali ki dei ban da kynmaw ban peit bha ïa ki Signboard bad ïa ki jaka ba la buh dak ne Signal kum ki Night Visibility ba la buh ha ki jaka ba don jingma khnang ban lait na kano kano ka jingjia ba sngewsih bad la kyntu ruh ïa baroh ba kin ai ka jingïatreilang khnang ba ka kam kan ïaid beit bad kan kham kloi ka jingpyntrei.