Shillong, Naiwieng 25: Ha kawei ka jingjïa ka bym ju ïohsngew koit, kawei ka Longïing kala leit tih da ka thliew na shilïang sha shilïang jong ka surok ka tnad Public works Department (PWD) hapoh ka Shnong Traw Saitkhlieh, East Khasi Hills, ban khang syndon ïa ka lynti ïaid shapoh ka shnong.
Kane ka jingjïa kala jïa shiteng miet jong ka 23 tarik Naiwieng ha kaba kane ka Longiing kala wanrah da ka JCB ban khlong thliew ïa ka surok na shilïang sha shilïang.
U Rangbah Shnong ka Traw Saitkhlieh Bah Donborlang Kurbah u pyntip ba kane ka jingjïa ka dei tang ka jingkynnoh leh donbor jong ka longïing ka kong Florida Kharshiing bad ïa ka JCB la wanrah da u Khun uba kyrteng u Filick Kharshiing.
U pyntip ba haba ïoh jingtip ïa kane ka jingkhlong thliew ïa ka surok, kum u Rangbah Shnong ula phone mar mar sha ki bor ba dei khmih ka PWD, PHE ban ïoh jingtip ïoh dei ba ki phah ma ki ban tih ïa ka surok ïoh don kano kano ka kam ba ki pyntrei. U ïathuh ba kine ki tnad kim don jingtip satïa ïa kane ka kam.
Halor kane ka jingshem, u Bah Donborlang u ïathuh ba ula pyntip noh sha u Sordar Shnong bad la leit ban buh da ka ejahar hapoh Mawngap Police Station halor kane ka jingjïa.
U Sordar u pyntip ba kum kane ka jingjïa kala jïa teng ha u snem 2020 bad ïa kane ka kam ruh la leh da ka kong Florida Kharshiing kaba shong ba sah ha Nongrah Shillong.
U ïathuh ba kane ka Longkmie kala kam trai ba kane ka jaka ba ïaid ka surok ka dei jong ka bad kala leh ïa kane ka kam da ka jingthmu ban ker ïa katei ka lynti ïaid. U ïathuh ba kum u Sordar ula khot ïa kane ka Longkmie sha ka Dorbar ban ïakren sani bha ïa kane ka kam khamtam ba ka surok ka dei kaba la don naduh us nem 1966 hynrei la ong ba kane ka Longkmie kala mih jyndat na ka Dorbar khlem da ïakren sani ban pynshisha ïa ka hok longtrai ïa ka jaka.
U Sordar ula kyrpad ïa ki bor Sorkar ba kin shimkhïa mardor ïa kane ka kam bad ïa ki Pulit ruh ba kin leh ïa kaba donkam.
Ki paid nongshong shnong ka Traw Saitkhlieh, kila ïamih paidbah hynne ka step ban tep khyndew bïang ïa kane ka surok kaba la khlong thliew da kane ka longiing khnang ba yn lait ban ïaid bïang ki kali.
