Shen yn sorjamin ka Municipal ïa ki jaka die madan, hap pynbiang ki nongdie ïa ki kot ki sla

By Mawphor News Desk On Nov 26, 2023

Shillong, Naiwieng, 25: Shen ka Shillong Municipal Board (SMB) kan sa pynlong ïa ka jingsorjamin ïa ki jaka shong die madan ha shilynter ka surok Khyndai Lad, Jail-Road, Barik, Malki-Dhankheti, Laitumkhrah bad Polo naduh ka 4 tarik haduh ka 16 tarik, Nohprah, 2023.
Kane ka jingsorjamin ïa ki lynti ïaid kjat ba la shong da ki nongdie madan ka long hadien ba ka Sorkar Jylla ka la pynmih paidbah ïa ka ‘Meghalaya Street Vendors (Protection of Livelihood and Regulation of Street Vending) Scheme, 2023’ ha ka 25 tarik, Risaw ba la shna hapoh ki kyndon jong ka “Street Vendors (Protection of Livelihood and Regulation of Street Vending) Act, 2014”.
U Chairman jong ka Town Vending Committee uba long ruh u Chief Executive Officer (CEO) jong ka Shillong Municipal Board (SMB) u la ong ba kane ka skhim ka long ban ïada ïa ki nongshong die madan bad ban ithuh da ka aiñ ïa ka kam die jingdie harud surok da kaba ai ïa ka jaka kaba kham kylluid khnang ba ki nongdie madan kin dup lah ban leh ïa ka khaïi k ka pateng. Kane ka skhim ka long ruh ba pyntreikam haba shit haba shai haba ai ïa ki jaka ban shong die madan, ban pynthikna ba ka jingai jaka kan long khlem kano kano ka jingpynïapher. Ka skhim ka don ruh ïa ki kyndon kiba ïadei bad ka koit ka khiah bad ka jingshngaiñ ka ban pynthikna na ka bynta ki paidbah.
“Ka skhim kan don ruh ïa ki kyndon ban ithuh bad ban pynrung kyrteng ïa ki nongdie madan lyngba ka jingleh ïa ka jingsorjamin da ki Town Vending Committee (TVC), kiba hap hapoh ka jylli treikam jong ki,”ong u Chairman ka Town Vending Committee.
Ïa ka jingleh sorjamin yn sa leh da ka Digital Format lyngba ka aplikeshon ban sa shna da ka Sorkar Meghalaya. Ha ka Data ban sa lum jingkheiñ ha ka por ba leh sorjamin yn sa pynrung ïa ki jingtip kiba bniah jong ki nongdie madan bad ïa ki jait jingdie, ïa ka por shong die jingdie, ka rukom die, bad kiwei kiwei.
Katkum ki kyndon jong ka skhim, ki nongdie madan harud surok kin sa hap ban pynrung kyrteng ban ïoh ïa ka jingpynithuh, ka jingpynshisha ba ki dei kiba shong basah ha Meghalaya la kumno kumno lai snem, ka jingpynshisha ba ki dei kiba ju im kamai jakpoh na ka kam die jingdie harud surok ha kajuh ka jaka ne shnong (kumjuh ruh na ka bynta kiba shu die ha ki kali) na ka bynta hynriew bnai kata naduh ka sngi ba la pynmih ïa ka jingpynbna ban leh ïa ka jingsorjamin.
Ka jingpynrung kyrteng ïa ki nongdie madan kan long tang na ka bynta san snem. Hadien ba la pynrung kyrteng ïa ki nongdie madan ba dei hok, ka TVC kan sa ai ïa ka Certificate of Vending (CoV) katkum ka jingdon jong ka jaka ban shong die jingdie bad kumjuh ruh yn sa ai ïa ka ID Card sha ki nongdie madan ba la ïoh jingithuh ka ban treikam tang na ka bynta shi snem.
Tang ka CoV kan long ka dulir ban pynshisha ïa ka hok jong ki nongdie madan ban shong die jingdie ha ki jaka ba la ithuh. Ha kajuh ka por, ka Sorkar bad ka TVC kin sa pynkhreh ruh ïa ki City/Town Street Vending Plans ïa kiba yn sa phiah ïa ki jaka die bad ïa ki jaka bym shah shong die madan ha kiba bun ki bynta jong ka nongbah/shnong.
“Ka skhim kan long kum ka sakhi ïa ka jingkular jong ka Sorkar ban pynkupbor ïa ki nongseng kam la jong bad ban pynkhlaiñ shuh shuh ïa ka imlang ka sahlang. Kan plie lad ym tang ïa ka khih ka kamai hynrei kan kyntiew ruh ïa ka jingim jong ki nongshong shnong,” la ong u Chairman jong ka Town Vending Committee.