Tieng thot thot ka UDP ban weng na sorkar – Kadei ka dak jingjop jong ka NPP : Samlin

Ngim ju kular ïa ka bym lah : Prestone

0

Shillong, Jymmang 01 : U kyrtong ka NPP na Sohiong, Bah Samlin Malngiang u la ong ba jingbymnud jong ka UDP ban weng noh na ka sorkar kadei ka dak ka jingkyrmen ïa ka NPP ha kane ka elekshon kaban sa long shen mynta u bnai. “Ha ka sngi Saitjain nga la ong ïa ka UDP kaba la kynthoh jur ïa ka NPP hangne ha Sohiong ba ki dei ban weng noh na ka sorkar bad sa kynthoh katba mon. Hynrei haduh mynin ruh ym i dak ei ei haduh mynta ruh kim pat nud ban weng,” u la ong haba kren ha katei ka jingïalang ïalap elekshon kaba long ha Krang.
Nalorkata utei u kyrtong u la ong ruh ba katei ka jingleh jong ki ka pynpaw ba ki tieng thot thot. “Shisien ba ki la tieng ban leh ei ei kamut ka jingjop ha Sohiong ka la dei ka NPP,” u la bynrap biang.
Shuh shuh u ong ruh ba lada phai sha ka UDP, katei ka party ka la aireng la 12 sien ha Sohiong hynrei ka dang jop tang shisien, kata tang ha u snem 1998 hynrei haduh mynta kam pat jop tang shisien ruh.
U Bah Samlin u la ong ruh ba lada dei ba thep vote lang bad kiwei ki constituency ha ka 27tarik u Rymphang kin lynga namar ym pat tip mano ban thaw sorkar. Hynrei mynta pat ki la tip lypa mano ba ïalam ïa ka sorkar bad ba ïa ka shuki Myntri Rangbah bad Symbud Myntri Rangbah la bat da ka NPP.
Shwa kane, u Bah Samlin u la ong ruh ba lada niew ïa ki kam pynroi ba u ïoh na ka sorkar ki la poi da ki phew phew klur tyngka la ka long naduh ka surok, ka umbam umdih bad kiwei kiwei. U ong ruh ba mynta lei lei la wan sa ka surok Western Bypass kaban pynmyntoi haduh katta katta ïa ki paidbah nongshong shnong.
Ha kane ka sngi, u Bah Samlin u la ong ruh ba hadien ba u la jop biang ha kane ka kynti un trei arshah na kaba u trei ha ka samoi ba la dep na ka bynta jingmyntoi jong ki paidbah.
Na ka liang u National Vice President ka party Bah Prestone Tynsong ba dei ruh u Symbud Myntri Rangbah haba kren ha ka jingïalang u la ong, “Ngin ym kular ïa kaba ym lah ban leh namar ha ka por elekshon bun kiba shah pynbiej ha ki duplicate kiba tang arbnai hadien ka elekshon ki la jah.”
Katei ka jingkren jong u kadei hadien ba ki la ïoh lum khubor ba ki don ki nongïalam na kiwei pat ki party ki leit ban rung iing bad kular ban pynïoh kam sorkar ha man la ki longiing. “Ngi na ka NPP ngi la ong ba lada paidbah u ai ïa ka jingshaniah, ngin pyrshang ban pynmih kam haduh 5lak ngut naduh 2023 – 2028 ym dei tang ki kam sorkar hynrei ba kin ieng ha la ki jong ki kjat khnang ba kin lah ban aikam kylla ïa kiwei pat.”

Leave A Reply

Your email address will not be published.