Pynthikna u Conrad, arngut ki MLA ka PDF kin pynïasoh sha ka NPP ha ka 6tarik
Jop shwa, ngin sa leh ïa kaba donkam
Shillong, Jymmang 01: U National President ka National People’s Party (NPP), Conrad K Sangma ha ka sngi Nyngkong u la ong ba ha ka 06tarik mynta u bnai kin sa pdiang burom ïa arngut ki MLA bad ki nongialam na kawei pat ka party ban wan pynïasoh pura noh bad ka NPP.
Ïa kane u Conrad ba dei ruh u Myntri Rangbah ka jylla u la kren ha ka jingïalang ïalap elekshon na bynta u kyrtong ka party na Sohiong constituency, Bah Samlin Malngiang ha Krang.
Shuh shuh u Myntri Rangbah u la ong ruh ba um donkam shuh ban pyntip kiei kita ki riewrangbah bad ki MLA na kiwei ki party kiban wan ban pynïasoh sha ka NPP ha katei ka sngi namar baroh baroh ki la tip lut.
“Kane ka elekshon ka long kaba donkam bha namar ha kine ki khyndiat sngi phin sa ïohsngew shuh shuh ki khubor ba bha shaphang ka NPP namar kin sa don ki riewrangbah na kiwei ki party kiban wan pynïasoh,” u la bynrap shuh shuh.
Lah ban kdew hangne ba ki khubor ki la phriang la kham slem ba arngut ki MLA jong ka PDF ba kynthup ïa u Bah Gavin Mylliem bad u Bah Banteidor Lyngdoh kin wan ban pynïasoh noh pura sha ka NPP.
Kumta, na ka liang u Conrad u ong ruh ba da kane ka jingshaniah kaba ki ïoh mynta na ki paidbah ka la pynlong ïa ka party ba kan long kawei na ki party heh ha ka ri India baroh kawei.
Halor ka jingkyrpad ki nongïalam ka NPP Sohiong ban weng noh uwei u Myntri na ka sorkar MDA bad thung bujli noh da u Bah Samlin ha ka shuki Myntri ynda la jop ha kane ka elekshon, na ka liang u Conrad u la ong ba jop shwa bad na ka liang ka party kan sa shimkhia ban leh ïa kaba donkam.
Mynta, ka NPP kaba don 26ngut ki MLA da ka jingwan pyniasoh kitei ki arngut kan sa kiew sha ka 28 ngut bad lada ka jop sa na Sohiong pat kan kiew sha ka 29 ngut.