Hapoh ar bnai yn sdang noh ka jingtih dewïong katkum ka jingstad saïan: Conrad

Shillong, Jymmang 01: U Myntri Rangbah ka Meghalaya, u Conrad Sangma, u la ong ba ka sorkar India bad ka sorkar Meghalaya ki ladep pynkhreh lut ki kot ki sla bad kiwei kiwei de ki jingdonkam na ka bynta ka Scientific Mining ne ka jingtih dewïong kaba katkum ka juk kaba mynta kaban nym ktah satia ïa ka mei mariang.
Ïa kane u Conrad, u la pynpaw haba kren ha ka jingïalap elekshon ha Krang na ka bynta ban ïalap elekshon ïa u Bah Samlin Malngiang, u kyrtong jong ka Seng NPP.
“Ka sorkar Meghalaya bad ka sorkar India ki la pynkhreh ban sdang noh ïa ka Scientific Mining hapoh hynriew phew sngi”, la ong u Conrad, uba long ruh u National President jong ka NPP.
Hapdeng ka jingrisa ki paidbah, u Conrad, u la ong ba hadien ka jingkhang tih dewïong da ka NGT ha u snem 2014, ka sorkar jylla hapoh ka jingïalam ka NPP, ka la ujor mukotduma sha Supreme Court ha u snem 2019 bad ka ïingbishar ka la weng noh ïa kane ka jingkhang tih dewïong bad bthah ïa ka sorkar Meghalaya bad ka sorkar India ban thaw ïa ki lad ki lynti na ka bynta ka Mining Plan bad ïa ka rukom aiwai khnang ban sdang noh ïa ka scientific mining. U Conrad u la ïathuh ba ka sorkar India ka la mynjur ïa ka mining lease ne ka jingaiwai ban tih dewïong ïa ki saw ngut ki nongtih dewïong.
Ha kane ka jingkren, u Conrad u la ïathuh ruh halor ka jingïaid ka kam ban shna noh ïa ka Western By Pass kaba la mang ban pynlut haduh 800 klutr tyngka. Kane ka surok kumba 80 percent kan ïaid na ka Sohïong Constituency bad lyngba kane ka roi ka par kan wan ha Sohïong Constituency. “Hato phi lah ban mutdur haduh katno kin kylla dur ki shnong ki thaw da ka jingwan kane ka surok?”, la ong u Conrad.
U la ong ba kan plie lad ïa ka ïoh kam ïoh jam, ka kam shang pyrthei bad kiwei kiwei bad kane ka dei ka saiñpyrthei ha ka roi ka par lyngba ka NPP.
U la kular ruh ïa ki paidbah ba ka sorkar kan peit ïa ka jingdonkam ha la liang ka koit ka khiah, ki jaka pule bad kiwei kiwei de ki jingdonkam.
U Conrad um shym la map ruh ïa ki Party kiba ïatreilang ha ka sorkaar MDA, kiba la beiñ la khoh ïa ka NPP wat haba ki ïatreilang bad ka ha ka sorkar MDA. U nongïalam ka NPP, u la pynkynmaw ba ha ka kolshor jong u Khasi bad u Garo kam ju don ka jingbynthiew ïa ka pliang ja. “Ngim ju bit ban bynthiew ïa ka pliang ba ngi pyndonkam ban bam ja”, la ong u Conrad.
U la ong ruh ba na ka liang jong u, um ju beiñ ju khoh ïa kiwei pat ki nongïalam kiba ïatreilang ha ka sorkar. Hynrei u la ong ba u sngewmong ban ïoh sngew ïa ki nongïalam jong kiwei pat kiba beiñ ba khoh ïa ki para nongïalam ba ïatreilang ha ka sorkar. “Nga pang ka mynsiem haba ïoh sngew ba ki nongïalam ki kren beiñ ïa ki para nongïalam wat haba ïatreilang ruh”, u la ong.