Hapdeng ka jingïam pait dohnud, la thang noh ïa ka met jong ka samla Walinda Binong

Nongpoh, Jymmang 01: Hapdeng ka jingïam kthang bad ka jingpait dohnud jong ki kmie ki kpa, ka hynmen bad ki baïeid bathoiñ baroh, ïaka met ba sah jong ka samla Walinda Binong kaba khlad noh ha ka 27 tarik u bnai Ïaiong ha jaka sah jong ka ha Mody University ha jylla Rajasthan la thang noh mynta ka sngi hadien bala pyndep ïaka jinglehñiam ba khatduh katkum ka riti ka dustur.
Kum ban shu kdew hangne ba katei ka jingïap jong katei ka samla kala pynshaïong ngaiñ ïaka ïing ka sem, ka shnong ka thaw bad ki baïeid ba thoiñ baroh, kiba dang sah haka umdum, kaba long ruh tang kum ka jingphohsniew ïa ka kmie bad u kpa bad kawei ka hynmen kynthei jong katei ka samla kiba don tang 2 ngut shipara bad kumba long haduh mynta kim pat sngew lah ngeit ba ka khun jong ki kam don shuh hangne ha sla pyrthei.
Naka liang ki paidbah kila tuid ruh sha ka shnong Nongagang Marngar mynta ka sngi ban leit sngewlem ïaka jingkhlad noh jong katei ka samla haka rta kaba dang khynnah bad dang khie dang san.
U Bah Michael Binong kum u Kñi Rangbah ka kur Binong u la ong kumba ka jingïap katei ka samla kam ai jinghun ïaka ïing ka sem naka liang ka kur ka dawa naka sorkar jylla bad kumjuh ruh ka sorkar Rajasthan ba ki dei ban shim khia ïa kane ka kam ban pynlong ka jingtoh kit kaba bñiah watla dei shaduh CBI naka bynta ka jingbishar ba hok.