Shillong, Jymmang 01 : U President rangbah jong ka UDP, Bah Metbah Lyngdoh u la pynpaw ïa ka jingkyndit kaba khraw ban ïoh jingtip ba ki don ki party kiba tieng that that ïa u ba un rung wan ïalap elekshon na ka bynta u kyrtong ka party ha Sohiong constituency.
Ïa kane, u Bah Metbah u la kren ha ka jingïalang ïalap elekshon kaba long ha Krang na bynta u Bah Synshar Kupar Roy Lyngdoh Thabah.
U Bah Metbah u la ong ruh ba kum ki nongkyrshan jong ka UDP kim dei satia ban khang ïa kiwei pat ki nongïalam jong kiwei pat ki party ban wan ïalap elekshon ha katei ka constituency.
“Kadei ka mon laitluid jong kano kano ka party ban rung ha kano kano ka iing, balei phi sngew sheptieng ban rung manga. Nga wan tang ban pynshngaiñ,” u la bynrap biang.
Shuh shuh u ong ruh ba u Myntri Rangbah ha katei ka sngi u wan ha Krang namar kadei ka hok ïa u ban wan. “Hynrei ban wan manga ym long, nga ruh nga dei u president te, da wan kine ki nongkitkam ba lei ym long. Ngam tip balei..” u la bynrap biang.
U Bah Metbah u ong ruh un wan beit bad un rung beit ban synran ïa u kyrtong ka party. “Kine kiwei mynta ki la khynñiuh namar ki ïohsngew ïa ka sur kaba ïaid ha baroh kawei ka constituency ka lyer jong ka UDP bad jong u kyrtong ka party, Bah Synshar Roy.”
U President ka party u ong ruh ba ha ka por ba ki ai tiket ïa baroh ki kyrtong ha ki constituency, ki la dep buh lypa ïa ka Sohiong kum kawei na ki constituency kaba ka party kan jop.
Shuh shuh u ong ruh hadien ka jingkhlad kyndit u Maheh HDR Lyngdoh kum u kyrtong ka party, na ka liang ka Iing, ka Kur bad ruh na ka liang ka party kum ki mawbyrsiew da kawei ka sur ki la mon ïa u Bah Synshar ban bteng ïa ka kam.
Hadien kane, u Bah Metbah u la ong ba ki paidbah ba bun ki pynpaw ba kin ai ïa ka vote ha kane ka elekshon kaba mynta. U ong ruh ka jingdon u kyrtong uba biang ban mih bujli ha jaka u Maheh HDR kan ïarap arshah ïa ka party nalor ka jingtreikam borbah jong ka vote sngewlem bad ka vote sngewnguh na kito ki nongkyrshan kiba ieid bad burom ïa utei u nongmihkhmat ba la khlad noh.
Ha kane ka sngi la ïoh ruh ruh ïa ka jingkren na u kyrtong bad ruh na ki nongïalam ba hakhmat jong ka party.
