Nongstoiñ, Nailar 18: Ka District Congress Committee ha ka sngi saitjaiñ ka la thung bujli ia u Bah Eric Kharsyntiew ban shimti thymmai kum u President ba thymmai jong ka Nongstoiñ Block Congress Committee (NBCC) hadien ba ka Meghalaya Pradesh Congress Committee (NBCC) ka la sospon haduh 6 snem kynthih ia u MLA ka Nongstoiñ Constituency hadien ba la lap ba u don bynta bad ka Sorkar Meghalaya Democratic Alliance (MDA) ba ialam da ka National Peoples Party (NPP).
Ka jingpynlong ïa ka jingïalang ba kyrpang da ki dkhot ka Executive Committee ka long ruh ban ïa phylliew jingmut kumno ban nang pynkhlaiñ shuh shuh ïa ka party ha baroh lai tylli ki Block ba kynthup ïa ka Nongstoiñ, Mawshynrut bad ka Rambrai Jyrngam.
Ka jingïalang ka la ïakren sani ha kaba ïadei bad ka jingpynkhlaiñ ïa ka Nongstoiñ Block Congress Committee.
U President jong ka District Congress Committee (DCC) West Khasi Hills u Bah Bormanding Nonglang ha ka jingïakren bad ki lad pathai khubor u la ong ba ka jingthung bujli ka dei hadien ba ka ïing ka la ïoh ïa ka jingbthah na ka MPCC bad na ka All India Congress Committee (AICC) ba ïa u bah Gabriel Wahlang la sospon haduh hynriew snem.
Ha kane ka sngi ka ïing ka la mynjur ruh ban pdiang sngewbha ïa u MDC barim jong ka Rambrai Jyrngam Constituency u Bah JTS Thongni ïa ka jingtyrwa ban wan phai biang sha ka sem barim.
Ha kajuh ka por la thung ruh ïa u Bah Fourteenson Lyngkhoi kum u General Secretary jong ka District Congress Committee ba un khmih ïa ka Mawshynrut Block Congress Committee.
