Shillong, Nailar 18: Ka Hynñiewtrep Border Disputed Redressal Forum (HBDRF) ka la ïakynduh ïa u MP ka Shillong Parliamentary constituency Dr R.J Syngkon, bad aiti ïa ka dorkhas ba un kren lem ha Parliament halor ka jingpynphai noh ïa ka Block-I (Elala Labang Nongphyllut bad Pangam Raliang) sha Meghalaya.
Ka HBDRF ha ka jingïakynduh ïa u MP ha Saint Clareth Parish Hall, Phramer, West Jaiñtia Hills District haba pynpaw ruh ïa ka jingartatien ba ka jingïakren pynbeit pud hapdeng ka Meghalaya bad Assam kan poi sha ka thong ban pynphai ïa ka Block-I sha Meghalaya.
La ong ba ha kane ka dorkhas, ka Forum ka la kren shaphang ka jinglong trai man trai jong ki Khasi Pnar ïa ka Elaka Labang Nongphyllut bad Pangam Raliang (Block-I) na ki khana pateng bad ki jingthoh jingtar ne ki historical fact.
Katkum ka kyrwoh ba la phah da u Chairman Bah Chandame Sungoh u la ong, “Ka Forum ka pynpaw ïa ka jingsngewsih halor ka jingleh donbor ka Sorkar Assam ha ka por ba thaw ïa ki District Council na ka bynta ki riewlum ka Jylla Assam ha u snem 1949-50 da kaba pynkhlad bad pynïasoh jubor ïa ka Elaka Labang Nongphyllut bad Pangam Raliang (Block-I) sha ka United Cachar & Mikir Hills ha ka jaka ban don bad ka United Khasi Jaiñtia Hills District Council kumba ju long naduh kulong kumah”.
Shuh shuh u Nongïalam ka HBDRF ula pynsngew ïa ki jingshah lehbeiñ shah thombor ki paid Khasi Pnar jong kane ka thaiñ naduh ba kila shah pynhab jubor sha Karbi Anglong Assam.
Ula ong ba ka la don ruh ka Notification kaba ka Sorkar Assam ka la kubur ba ka la leh bakla halor ka jingpynhab jubor ïa kane ka Elaka sha ka United Cachar Mikir Hills bad kumjuh ruh ka shithi ba la phah sha ki District Council- ka United Khasi & Jaiñtia Hills bad ka United Cachar Mikir Hills ba kin shimkhia ha kaban pynbeit ne pyndep ïa ka kam ban pynphai biang ïa kane ka Block-I sha ka United Khasi Jaiñtia Hills District.
Ha kajuh ka por, ka Forum ka la pynpaw ïa ka jingartatien ba ka jingïakren pynbeit pud hapdeng ka Meghalaya bad Assam, kan pynïoh ïa ka hok ne pynphai biang ïa ka Block-I sha Meghalaya.
“Ngi kyrpad ïa phi (MP) ban shimkhia bad kren lem ïa kane ka kam ha Parliament bad ruh bad ki heh Sorkar ha Delhi ban pynthikna ba kan ym don kano kano ka jingleh shiliang lane jingleh arsap haba pynbeit ïa u pud u sam,” ula ong.
U pyntip ba u MP ula ai ka jingkular ba un shimkhia ïa kane ka kam bad ba un sa leh ïa kaba donkam ha kaba ïadei bad kne ka jingdonkam kaba kyrkieh ïa ka jylla.
