New Delhi, Nailar 18: Ka Supreme Court, dalade hi, ka la shimti ïa kam jingjia ba shah leh beijot bad shah pynïap jong kawei ka doktor ha Kolkata kaba la pynkyndit ïa ka ri baroh kawei bad kaba la wanrah ka jingïakhih kaba jur jong ki doctor ha baroh kawei ka ri. Ka meij ki nongbishar ba lai ngut ba la ïalam da u Chief Justice of India DY Chandrachud kan pynlong ïa ka jingshong bishar ha ka sngi baar.
Ïa kane ka jingjia ladep ruh ban pynlong ka jingbishar da ka Calcutta High Court, ha kaba ka jingbishar ha u taiew ba la dep ka la pynmih ka hukum ba ïa kane ka jingjia dei ban tohkit da ka Central Bureau of Investigation ne CBI, da kaba ong ba lada ki pulit kim lah ban pyndep ïa kane ka kam ha ka sngi U Blei, yn shimti noh da ka CBI.
Kane ka kam ka la poi sha ka High Court hadien ba ki kmie ki kpa bad khyndiat ngut kiwei pat ki la pynpaw ka jingbym kmen ïa ka jingtohkit ki pulit bad ki phah ïa ka jingujor ka jingkyrpad. Ka court ka la pynpaw ïa ka jingbym sngewhun ïa ki pulit bad ki bor pynïaid da kaba shai bad la mih ki jingkylli halor ka kam ba la trei da ki pulit naduh kaba sdang kaba kynthup ka jingpynslem ban shah ïa ki kmie ki kpa ban peit ïa ka met bad kiwei.
