Nongpoh, Nailar 18: Ki Pulit ka Byrnihat Police Outpost ha ka sngi U Blei ha ka por 1.55 baje mynsngi ki la ïoh jingtip na u Manager jong ka Wajri Petrol Fuel Stop Lumnongrim, Byrnihat ba la don uwei u nongñiah trok uba la thiah hapoh ka trok khlem da khie shuh naduh hynnin ka sngi Saitjaiñ.
Mar mar ki Pulit jong ka Byrnihat kiba la leit tohkit, ki la lap shisha ba u nongñiah trok u la thiah iap hapoh ka trok.
Une u nongñiah trok u dei uba la tip kyrteng kum u Mofidul Islam na Bapurbhita Pt-3, Dhamar Reserve, Goalpara, Assam bad ka trok kaba u la pynieng ha Petrol Pump ka dei don ia u nombar AS-01-SC-1741.
Kumba la ïoh lum jingtip na ki Pulit ka Ri Bhoi, la ong ba katkum ka CCTV ba la pyndait ha ka Petrol Pump, la ong ba une u nongñiah trok u la pynieng ia ka trok ha ka petrol pump ha ka sngi Saitjaiñ ha ka por 2.15 noh sngi bad dei namarba um shym la khie wat haduh mynta ka sngi u Blei ha kaba u Manager u la pyntip sha ki bor pulit ka Byrnihat Police Outpost.
Ha ka jingtohkit la ïoh jingtip ruh ba u nongñiah jong ka trok u dei u nongtrei jong ka Star Cement kaba u la wan na Star Cement Plant Chamata Pathar Sonapur, Assam bad u la thmu ban leit sha Lumshnong ha East Jaiñtia Hills.
Hadien ka jingtohkit ki Pulit la rah noh ia ka met jong u sha Civil Hospital Nongpoh ban leh ia ka postmortem.
Ki Pulit ki ladep ruh ban pyntip sha ki bahaing hasem jong u nongñiah trok bad halor kane ka jingjia.
