Shillong, Nailar, 18: Ka khubor ba la ïoh na ki pulit la ïathuh ba u AE (Civil), AAD (Adm) na ka bynta u Chief Engineer GQ Chief Engineer Shillong Zone, MES, Spread Eagle, Shillong u la phah ka jingujor ba ha ka 9 tarik mynta u bnai ki runar bym lah ban ithuh ki la tuh ïa ki sanitary fitting napoh katei ka ophis.
Ha kawei pat ka jingjia ka Singje Ch Marak da ka ktien ka la pyntip ba ha ka 14 tarik mynta u bnai, ki runar bym lah ban ithuh ki la tuh ïa 3 tylli ki GI pipe ba dei trai da ka PHE Department, kiba la pyndait napoh ka DC Park public distribution system napoh ka ïing jong ka kaba ha Balading, Tura (WGH).
Shuh shuh ki pulit ki la ïathuh ba kawei ka longkmie kaba sah ha ka shnong kaba hab ha West Garo Hills ka la phah ka jingujor ba ha ka 21 tarik u Naitung, 2024, ka la wengnoh na ka jingïadei paralok bad uwei uba kyrteng u ‘Atchirak T Sangma’ lyngba ka Facebook, uba kham hadien u la pynithuh ïalade ba udei u doctor napoh ka Tura Civil Hospital bad u la tyrwa aikam ruh ïa ka. Kane kaba la ujor ka ïathuh ba ka la phah ruh ka pisa T. 15,000/- lyngba ka QR code jong u bad hadien ka la shem ba ka la shah thok.
Na ka liang ki pulit ki la ïathuh ba ha ka 10 tarik mynta u bnai ha ka por 12.05 nohphai sngi uwei u briew bym lah ban ithuh u la shah bat bording electric ha Hawakhana, Tura (WGH) bad ha kaba la pynkitnoh sha Civil Hospital Tura. Kham hadien la ithuh kyrteng ïa u kum u Miah (40 yrs) jong ka Sorabat, PO Noapar, Bangladesh.
Sa kawei pat ka jingjia ki pulit ki la ïathuh ba kawei ka longkmie kaba na West Garo Hills ka la phah ka jingujor pyrshah ïa u Ashraful Sk, owner / operator jong ka CSP, ba u la sei tuh ka pisa kaba la kot haduh T. 52,000/- napoh ka Bank account jong ka, khlem ka jingmynjur jong ka.
Ha kawei pat ka jingjia ki pulit ki la ïathuh ba u Dheeraj Singh Chauhan u la phah ka jingujor ba ha ka 12 tarik mynta u bnai ha ka por kumba 7.30 baje janmied, ki runar bym lah ban ithuh ki la tuh ïa shibun ki tiar shna ïing kiba la shongdor kumba T. 3.4 lak napoh Phulbari Store (WGH).
