Thoh u Most Rev. Victor ïa ka shithi sharai sha ki riewngeit bad ki Riewniam ka Jyllniambah Shillong

Shillong , K’lyngkot, 15: Da ki phew hajar ngut ki samla jong ka Balang Catholic hapoh ka shatri jong ka Shillong Archdiocesan Catholic Youth Movement (SACYM) ki la ïakynduh lang ha ka lympungbah kaba lai sngi jong ki samla kaba la long ha Good Shepherd Jongksha Zone IV, East Khasi Hills District kaba la kut noh ha ka sngi U Blei.
Ka phang pdeng jong kane ka lympungbah ka long “Ym slem, hadien ka Maria ka la khreh la khrum bad ka la leit bak bak sha rilum, sha ka shnong ha Judea.” (Luk: 1: 39).
U Archbishop jong ka Jylla Niam Bah Shillong u Most Rev. Victor Lyngdoh u la long u Kongsan ban pynmynta ïa ka nguh ka dem Blei h a ka por mynstep bad ka jingmane Sakrament Bakhuid ha ka por nohphai sngi, katba u Fr. Jameris Shylla u la ài ki kyntien sneng na ka jingthoh Bakhuid.
Ha ka por mynstep u Lamphang jong ka Iingdorbar Thawaiñ ka Jylla u Bah Metbah Lyngdoh u la sakhi lang bad pyllait paidbah ruh ïa ka Shithi Sharai ba la thoh da u Most. Rev. Victor Lyngdoh ïa kaba la ai kyrteng, “On Listening to the Priests, the Religious and the Faithful of the Archdiocese of Shillong.” Katba ha ka por nohphai sngi la sakhi lang da u Director General of Police (DGP) ka Jylla u Dr. R L. Bishnoy uba la long kum u Symbud kongsan kynthup ruh u Bah Pynïaid Sing Syiem uba long u MLA ka Mawryngkneng Constituency, u Diocesan Youth Director u Fr. Jameris Shylla, u President ka SACYM u samla Alvin Savio Kharkongor bad ki nongkitkam
U Archbishop Victor Lyngdoh haba ai jingkren sha ki samla u la pynkynmaw ba ki dei ban im ïa ka jingim ka bakhuid bad kaba lait na ki sniew baroh.
U la ài nuksa na ka mat phang pdeng jong SACYM ba la sot na ka Kospel u Lukas kaba batai ba ka Maria ka la long kaba la khreh la khrum ïa ka jingim na ka bynta U Blei. U la bynrap ka Maria ka long nuksa ïa ki samla ha ka Balang ban khmih thuh ïa ka jingim ba bha.
Ha ka nohphai sngi ka SACYM ka la pynlong ïa ka lympung jingïamir jingmut halor ka mat jong ki samla ïa kaba la ïoh jingkren na u President ka Seng SACYM u Samla Alvin Savio Kharkongor ha kaba u la ai ruh ïa ka kaiphot treikam jong ka Seng bad hadien kane la pynkup burom bad ài khusnam ïa ki samla kiba la pas bha ha ka jingpule bad ha ki kam ki jam.
Ban pynrhem ïa ka jingngeit ki khun samla, ka SACYM ka la pynkut ïa kane ka lympungbah da ka jingpynhiar noh ïa ka lama da u Most Rev. Victor Lyngdoh ha ryngkat u Director Youth Diocesan u Fr. Jameris Shylla bad pynbud sa ka jingrwai Anthem jong ka Seng bad ka jingaiti noh ïa ka lama jong kane ka lympungbah sha u President ka SACYM.
Ïa ka lympungbah kaba 22 jong ka SACYM yn pynlong ha St. Dominic Savio’s Church, Parish Mawlai ha u snem 2025.