Shillong, K’lyngkot, 15: Hadien ka jingphet noh jong u Bah Samlin Malngiang sha ka National People’s Party (NPP) ka Hill State Peoples Democratic Party (HSPDP) ka la pynkhreh ban sei bujli da u President jong ka HSPDP Youth Wing u samla Sandondor Ryntathiang ban pynïakhun na Sohïong Constituency ha ka elekshon sha ka Iingdorbar Thawaiñ ka ban sa long shen.
U Bah Samlin Malngiang uba la jop ïa ka Elekshon MLA ha u snem 2018 na ka tiket jong ka HSPDP dang shen u la iehnoh ïa ka jinglong MLA jong ka Sohiong Constituency shwa ban pynïasoh sha ka NPP da kaba ai daw ba u angnud ban pynkhlaiñ ïa ka NPP tang kum kawei ka seng saiñpyrthei kaba bun paid khnang ba kan ïoh synshar marwei hadien ka elekshon 20233.
U samla Sandondor u la rung sha ka jylli jong ka saiñpyrthei da kaba pynïasoh kum u dkhot jong ka HSPDP naduh ki snem 2014-2015 mynba u dang pule ha St. Edmunds’ College, Shillong hapoh ka jingïalam jong u President barim u Bah Ardent Miller Basaïawmoit ha u snem 2016 ha ka Bye-election MDC.
Kum u dkhot jong ka party u la shah jied kum u President jong ka HSPDP Youth Wing Krang Unit bad ha kajuh ka por kum u Secretary jong ka HSPDP Krang Unit.
Ha u snem 2018 u la shah jied kum President jong ka HSPDP Youth Wing East Khasi Hills District bad ha u snem 2021 u la shah pynkhamti kum u President jong ka HSPDP State Youth Wing bad ha ka juh ka por kum u Vice President ka HSPDP East Khasi HIlls District.
Une u samla uba la don mynta 27 snem ka rta u dei ruh uba la pyndep ïa ka kyrdan pule ha ka Master of Science (M.Sc) Mathematics na ka skulbah North Eastern Hills University.
Ha ka jingïakren bad u Mawphor u samla Sandondor u la ong ba ka jingmih shakhmat ban tyrwa ïalade sha ki paidbah ka Sohiong Constituency ka long namarba u angnud ban shakri kham bha ïa ki paidbah lyngba ka saiñpyrthei.
“Nga don ka jingangnud ban ai ka jingshakri ïa ki paidbah ka Sohiong Constituency da kaba nga la rung sha ka jylli jong ka saiñpyrthei hadien ba la bud ïa u MLA barim ka Sohïong Constituency ha ki san snem mynshwa. Dei kane kaba la pynkhih ïa ka mynsiem jong nga ban mih shakhmat ha kane ka kynti ban aireng ha kane ka elekshon sha ka Iingdorbar Thawaiñ ka ban sa long shen,” u la ong.
