Ha ka por ba bhah kam Myntri ha ka MDA baroh ki kyntait ïa ka tnad kam rep: Banteidor

Shillong, Kyllalyngkot 15 : U Bah Banteidor Lyngdoh, MLA ka Mawkynrew bad Myntri ba dei khmih ïa ka tnad kam rep ka Sorkar Jylla u la ong ba ha ka por ba bhah kam Myntri ha ka Sorkar Meghalaya Democratic Alliance (MDA) baroh ki la kyntait ïa ka tnad kam rep bad ma u pat u la shim ïa ka namar ba ki nongshong shnong ha Constituency jong u ki dei ki nongrep.
Haba kren ha ka jingïalang plie mawnongrim ban sdang noh ïa ka skhim sam um kaba 9 klur tyngka tam ha shnong Thynroit myn ha ka 14 tarik u Kyllalyngkot, 2023, ka sngi kaba u dap 46 snem ka rta, u Bah Banteidor u la ong ba mynshwa ki Myntri kiba peit ïa ka tnad kam rep ki dei ki Garo kumta kam don ka jingïakren.
Halor ka ka jingai lad biang ka Sorkar ïa ki nongrep ban pyndonkam dawai sboh, u la batai bniah shaphang ka jingïaid lynti haduh ban da pynurlong ïa ka jingangnud ki paidbah nongrep bad shen kin sa ïoh noh ha ka taiew ban wan lyngba ki Retailer kiba la ïoh license bad ïoh jingithuh da ka MeCOFED.
“Ha u 2018 ha ka por ba dang ïaid ïalap elekshon la buh jingkylli ïa nga kaei kaba ngan leh lada nga jop bad nga la jubab ba ki mat ba ha khmat eh dei ka lynti syngkien, ki kam ban kyntiew ïa ka jingsumar, ka pule puthi lyngba ki skul kiba paka, ka kam ïalehkai ban kyntiew, ban kyntiew ïa ki nongrep bad kam jngohkai pyrthei ha ka thaiñ “, u la ong.
U la ong ba ha kine ki san snem ki projek sam um ha ka Constituency kiba u la pynïoh ki long baroh 113 klur tyngka, ki surok kumba 200 klur tyngka bad ki jingtei ban kyntiew kam ïalehkai jan kot 50 klur nalor kiwei pat. “Ngam ïaid da ka thok ban jop elekshon “, u la ong ba da ka jingkyrkhu u Blei nalor bad ki paidbah ba u jop MLA u ïoh ban long Myntri ha ka Sorkar MDA.
“Ha ka por ba bhah kam Myntri baroh ki kyntait ïa ka tnad Kam rep bad nga kynmaw por ba long MDC ki nongrep ki la ïakhih pyrshah ïa ka jingkhang pyndonkam dawai sboh. Nga shim namar nga don ka jingsngewkhia bad nga kynmaw ïa ka Constituency kaba ki nongshong shnong ki dei ki nongrep”, u la ong.
U la ong ba u khlem ïaid marwei hynrei donkam ki paralok nongai jingmut kumno ban leh ïa ka dawai sboh bad da ka jingïatreilang la lah ban leh eiei na ka bynta ka jingdonkam bad jingmyntoi ki nongrep. “Ngi ïaid sha khmat bad ka la urlong hynrei donkam pat ban ïaid katkum ki jingbthah ym ban shu ïa leh ne ïakren ban ïohnong saiñ-hima”, u la ong
Da kaba ong ba hap ban tip bniah ban nym shah ïalam bakla, une u Myntri u la ong, “Kiei kiei ki jia ki jingshah ïalam bakla ki paidbah ka dei ha ka por elekshon bad baroh baroh ki ïa wan leh bha bad wan ïarap. Hynrei ka jingïatyllun lang baroh 10 snem kum u MDC bad MLA ki kam ki la kren kham jam”.
U la ong ba mynta na ka bynta ka dawai sboh u la dep ïakren haduh khmat u Myntri Sorkar India bad la ïoh biang. “La dep thep pisa 1 klur 30 lak lyngba ka tnad ban ïoh ïa ka dawai sboh bad ha ka taiew ban wan kan sa poi noh bad yn sam lyngba ki Retailer”, u la ong.
Ha kane ka jingialang la ïa donlang da u Bah A Khongwir, Executive Engineer PHE Hills Division, ki ophisar, u Bah Harkin Warjri, Sordar Thynroit, U Bah Egenstar Kurkalang, Dr Amanda A Pakynteiñ, u Bah Tympang Pohshna, uba la pynïaid ïa ka jingïalang bad ki nongshong shnong ka Thynroit nalor kiwei pat.