Shillong, K’Lyngkot 15 : Ka ktem jong ka Trinamool Congress ha Pynursla ka la pra phum hadien ba 26 ngut ki nongïalam ba hakhmat eh jong ki samla TMC ki la resaiñ noh na katei ka party, kaba la dep ban pynbna ruh ïa u kyrtong ban ïakhun pyrshah ïa u Bah Prestone Tynsong ha kane ka elekshon MLA 2023.
Ïa kitei ki nongïalam ba hakhmat jong ki samla TMC Pynursla la pdiang sngewbha da u District President jong ka NPYF East Khasi Hills, Bah Khraw Sohkhlet ha ryngkat ka jingdonlang u President bad ki nongïalam ba hakhmat jong ka NPYF Pynursla ha kane ka sngi Saitjaiñ ha ophis treikam ka party.
Kitei ki nongïalam jong ki samla TMC ba wan ban pynïasoh ha katei ka sngi ki kynthup lang naduh u President ka youth wing, samla Wanshwa Nongrum bad ruh u vice president samla Shining Khongthaw bad kiwei kiwei ki nongkitkam kynthup lang ïa ki dkhot.
Haba kren ha ka jingïalang, u samla Mewanshwa u la ong ba ki la don haduh 8 ngut ki nongïalam ba hakhmat eh jong ka party kiba la resaiñ lang hadien ba ki lap ba ka rukom treikam ha katei ka party kam long satia kumba ki khmih lynti. La kynnoh ruh ba kaba ki sngewsih eh kadei ba jan ha baroh ki kam la shu khyrwait beit da ki bor ba nabar khlem da sngap shuh ïa ki kum ki nongïalam ha ka party.
“Na kitei ki 8 ngut kiba hakhmat eh ki nongïalam 6 ngut ki la don bad ngi bad arngut kiwei pat ki la leit ban pynïasoh sha kiwei pat ki party. Mynta ngin dang ïa kren ruh ïa kiwei pat kiba dang sah ba kin wan treilang noh bad ngi,” u la ong.
U la ïathuh ruh ba hadien ba ki la resaiñ ki la don bun ki party kiba la ïa kren ban treilang na bynta ka elekshon 2023 hynrei dei hadien ba ki la ïatai sani bad ruh hadien ka jingïakynduh bad ki nongïalam ba hakhmat ka NPYF ba ki la shim ïa ka rai ban pynïasoh bad treilang bad ka NPP.
Shuh shuh u ong ruh ba ki don ka jingkyrmen ba da ka jingïatrei lang ryngkat ryngkat kin pyntikna ba u kyrtong ka NPP ba dei ruh u Symbud Myntri Rangbah ba mynta, Bah Prestone Tynsong un tam bun ha kane ka elekshon MLA kaban sa long shen.
Na ka liang u Bah Khraw Sohkhlet haba pdiang burom ïa kitei ki samla u la pynpaw ïa ka jingkmen kaba khraw ba kitei ki samla na ka party Trinamool Congress ki la ïohi bad sngewthuh ba dei tang ka NPP kaba trei na ka bynta ka bit ka biang jong ki samla bad khamtam eh na ka bynta ka roi ka pa ïa baroh.
“Ngi ruh ngi don ka bynta kaba khraw kum ki sengbhalang ha ka sorkar ym ban dawa ha surok hynrei markhmat beit ha Secretariat ban ïa kren na ka bynta bad ka sorkar,” u la ong.
Shuh shuh u ong ruh ba kadei ka kamram jong ki, kum ki samla ba don ha ka party ba bat ïa ka sorkar ban tynrong lang ïa ki kam jong ka sorkar khnang ba ka jingmyntoi kan long pura.
Nalorkata, u ong ruh ba nalor ba ki la dep tikna lypa ba u kyrtong jong ka party un jop da kaba suk ha kane ka elekshon, hynrei kaba ki kwah kum ki samla pat ka long ban pynïar ïa ka rukom treikam khnang ba ka jingshakri kan long kaba kham paka bad kaba janai ha ki liang baroh.
