Ther ki Rangbah ba kam ei u kyrtong NPP Mawkynrew ïa ka jingjop ki nongrep halor ka dawai sboh

Lada sdang da ka thok na khmat te shaei yn poi: Sordar Thynroit

0

Shillong, Kyllalyngkot, 15: Ar ngut ki rangbah nongïalam jong ki nongrep bad nongïalam shnong kiba la ïakhun pyrshah ïa ka jingkhang pyndonkam dawai sboh da ka tnad Agriculture ha ka Jylla naduh u snem 2014, kata u Bah Egenstar Kurkalang bad u Bah Harkin Warjri ki la ther tyngeh ïa ka jingkam ei u kyrtong ïakhun elekshon MLA 2023 ka seng NPP na Mawkynrew Constituency, Bah Kansing Lynshiang halor ka jingjop ki nongrep halor katei ka mat ïakren.
U Bah Egenstar, uba dei ruh u nongïasaid aiñ, u la ong “Ka tnad kam rep ka Sorkar Jylla ka la pymih ïa ka Notification ban khang pyndonkam dawai sboh ha ka 12 tarik u Jylliew, 2014 bad hadien katei ki nongrep ki hap ban shu thied tuh ïa ka dawai sboh ha ka dor kaba rem. U la ong ba ki nongrep ki la ïakren ïa la ki MLA ha ki Constituency jong ki ha kitei ki snem hynrei ka jubab ka long ba ym lah ban leh eiei shuh.
“Dei tad ha u snem 2015 ynda ngi la ïalum ïalang ngi la pynlong ïa ki jingïakhih kiba bun ban pyrshah ïa ka Sorkar ryngkat ki jingdawa ban pynduh ïa katei ka Notification namar ki nongrep na ki shnong bapher bapher kim lah ban shu ïaid syndet sha kata ka kam rep khlem pyndonkam dawai sboh namar ki la mlien baroh shi katta bad ka jingpynmih mar rep kan ktah khlem dawai sboh”, u la ong.
U la ïathuh ba la phah bun tylli ki shithi sha ka Sorkar Jylla barim ha ka jingïalam ka Congress ban ïakren halor katei ka jingdawa hynrei khlem lah leh eiei nalor ki jingïalang ïakhih bapher bapher. “Ka dei haduh da wan kane ka Sorkar ha ka jingpeit u Bah Banteidor Lyngdoh kum u Myntri ïa ka tnad kam rep la ïoh ïa ka jingiakren ha u snem 2020 ter ter”, u la ong.
“Ka por ka la ïaid bad ka dor dawai sboh ka la nang kiew khamtam ha u snem 2021 bad la ïakren biang ha ka jingïalang bad phah jingthoh sha u Myntri. Ka dei ha ka 03 tarik u Risaw, 2021 hadien ka khlam COVID-19 la ïoh ïa ka jingïalang ïamir jingmut bad ka tnad kam rep ha ka jingïalam u Bah Banteidor bad bud pat da kiwei ki jingïalang”, u la ong.
Da kaba kynthoh ba kiwei ki nongïalam saiñ-hima kim nud ban ïakren eiei ruh halor kane ka jingdawa, u Bah Egenstar u la ong, “Hadien bun bnai ki jingpynwit ha ki tnad treikam ka Secretariat, u Bah Banteidor u la leit shim hi ïa ka file bad rah sha u Myntri Rangbah ban phah soi bad ïoh ïa ka jingmynjur ban ïoh pyndonkam biang ïa ka dawai sboh ki nongrep”.
U la ong ba hadien bun bnai ki jingïaid lynti ka tnad Chemical and Fertilizer ka Sorkar India ka la mang ïa ka bhah dawai sboh sha ka Jylla Meghalaya ha ka 05 tarik u Kyllalyngkot, 2023 kaba long 1300 ton. “Nga la bud dien namar ka MeCOFED ka dei ka ban sam ïa ka dawai sboh sha ki nongrep lyngba ki Retailer bapher bapher kiba don license ki ban ai pat ïa ki jingbatai sha ki paidbah ynda la dep shah hikai”, u la ïathuh.
Da kaba kynnoh ba um dei beit na MeCOFED sha Thynroit kumba la ïalam bakla da kiwei pat ban ïohnong saiñ-hima bad pynbieit ïa ki paidbah, u Bah Egenstar u la ong ba ki Retailer ki dei ki ban sam ïa ka dawai sboh ryngkat ki jinghikai.
Kum ban shu kdew ba u Bah Kansing tang kum u kyrtong ka NPP u la rah da ka trok kit dawai sboh ha ka 13 tarik u Kyllalyngkot, 2023 ha ka jingïalang ha Thynroit bad plie ïa ka dala trok kum ka dak ka jingpyllait paidbah ïa ka dawai sboh sha ki paidbah kiba la rah star ban ïoh kit hynrei khlem ïoh satia.
Na ka liang u Bah Harkin Warjri uba dei ruh u Sordar ka shnong Thynroit da ka jingsngewdom u la kynther tyngeh ïa u Bah Kansing Lynshiang da kaba ong ba une u kyrtong u la thok bad ïalam bakla ïa ki nongshong shnong halor ka ‘subsidy’ dawai sboh bad pyrshang ban wanrah jingïapait ha shnong ha thaw.
U Bah Harkin u la ñion tyngeh ïa utei u kyrtong ka NPP u ba la kynnoh ba ka jingbym wan ïa donlang u Bah Harkin kum u Sordar ha ka jingïalang kaba la long ha ka 13 tarik u Kyllalyngkot, 2023 ha katei ka shnong ka dei ka jingleh shiliang khmat. “Kumno ngan leit sha katei ka jingïalang khlem ka jingkhot ïa nga”, la ong u Bah Harkin.
“Ki nongshong ki la ïathuh ïa nga ba wan kata ka jingsam dawai sboh bad ki la rah star ban kit hynrei la shu plie tang ïa ka dala trok bad phah biang noh shaei ruh ym tip ïa ka dawai sboh” u la ong da kaba pynpaw ka jinglyngngoh balei ki wan kheiñ bieit ïa ki nongshong shnong ka Thynroit. “Shu kam ei lut kat ïa kaba leh kiwei bad lada ka jingthok ka lam na khmat tip shaei yn ïa poi”, u la pynkut .

Leave A Reply

Your email address will not be published.