Sdang pynbieij ka BJP ban ai ILP lada wan ha ka bor, 3 snem khlem burom ïa ka Resolution

Shillong, Kyllalyngkot 14 : Ka BJP mynta ka la sdang ban kular har rukom bad pynbieij ïa ki paid nongshong shnong ka jylla namar ba la dei ka por election. U myntri ka sorkar pdeng uba dei na ka BJP u Rajeev Chandrasekhar uba dei peit ïa ka tnad Skill Development and Entrepreneurship and Electronics & IT u la kular ba lada ki paidbah ki jied ïa ka BJP ban wan ha ka bor ka BJP kan ai lut ïa baroh ki mat ba sahteng jongka Meghalaya kynthup ïa ka ILP.
Lada u kular ban ai da ïoh bat ïa ka jingsynshar kan eh aiu ban ai mynta namar lai snem tam mynta ki paidbah lyngba ki Nongthaw Aiñ jongka ïing Dorbar Assembly ka jylla ki la dep mynjur da ka Resolution naduh u Nohprah 2019 bad ai sha ka sorkar pdeng hynrei ka BJP ka sngap man man halor kane kam ai ktien shi kyntien ruh. Man ba leit ki heh sorkar ka jylla sha Delhi ka jubab ba ïoh dang bishar shi dang bishar bniah. Mynta pat kynsan kynsan tang namar ka election utei u myntri u wan bad kular ban ai ILP lada ki paidbah ki pynjop ïa ka BJP.
Hato ki paidbah ki nud ban ai jingshaniah ïa ka BJP namar tang ban wan ha ka bor kular lut lada ym wan ha ka bor te ym long ban ai ïa kaba dei hok ban ai kata ïa ka ILP bad pynrung ïaka Ktien Khasi bad Garo ha ka Khyrnit kaba phra.
Na ka liang jongka Khasi Students Union (KSU) ka la phah da u kyrwoh uba shai sha ka Bharatiya Janata Party (BJP) ba kam dei ban shu dawa ban pynurlong ïa ka jingdawa Inner Line Permit lymda ki paidbah ka Jylla Meghalaya ki pynjop ïa ka BJP ha kane ka elekshon sha ka Iingdorbar Thawaiñ ka ban sa long shen mynta u snem.
U Myntri Khynnah ka Sorkar Pdeng uba peit ïa ka tnat Skill Development and Entrepreneurship and Electronics & IT u Rajeev Chandrasekhar ha ka jingïakren bad ki lad pathai khubor ha ka sngi Thohdieng jong ka taiew baladep u la ong ba ka BJP kan weng lut ïa ki jingeh kiba la sahteng kynthup ruh ïa ka Inner Line Permit (ILP) lada ka ïohbat ïa u lakam synshar ha kane ka jylla Meghalaya.
Ka Sorkar Jylla ka ladep phah ïa ka Resolution sha ka Sorkar Pdeng ban pyntreikam ïa ka Inner Line Permit ha Meghalaya hadien ka jingmynjur jong ka Iingdorbar Thawaiñ ha u Nohprah, 2019.
“Naduh u snem 1985, 2001 bad 2013 ngi la dawa ïa ka Sorkar Pdeng ba kan pyntreikam ïa ka Inner Line Permit ha kane ka jylla jong ngi hynrei haduh mynta ka Sorkar Pdeng ka shu sngap kuman wat hadien ba ka Sorkar Jylla ladep ban phah ïa ka Resolution ban pyntreikam ïa ka ILP mynta la lai snem tam,” ong u General Secretary ka KSU u samla Donald V. Thabah haba ïakren bad u Mawphor lyngba ka telephone.
“Ka jingkren jong u Chandrasekhar ka long kumba shu dawa na ki paidbah ka jylla Meghalaya. Naduh u snem 2018 ka BJP ka la don ha ka Sorkar Meghalaya Democratic Alliance (MDA) ba ïalam da ka National Peoples Party (NPP) hynrei ka jingdawa jong ngi kam shym la urlong satia,” ong u samla Thabah.
“Ai shwa ha ngi ïa ka jingdawa ILP bad kata ka jingdawa ka dei ban sa wan hadien,” u la ong.
U la pynkynmaw ruh ba ka KSU bad kiwei kiwei ki sengbhalang ki ladep phah ïa ka jingthoh ban dawa ILP sha u Myntri Rangbahduh ka ri u Narendra Modi bad sha u Myntri ka tnat Kam Pohïing u Amit Shah bad aiti ruh ïa ka dorkhas ha u Shah ban pynkynmaw ïa u ïa kane ka jingdawa.